Dollarda sürətli artım - 5 noyabrda...

Trampın seçkilərdə mümkün qələbəsinə dair mərclərin artması ABŞ dollarını qlobal bazarlarda yenidən zirvəyə çatdırıb. İnvestorlar Trampın həyata keçirməyi planlaşdırdığı tariflər və antiimmiqrant siyasətinin dolları dəstəkləyəcəyinə inanırlar.

Publika.az xəbər verir ki, avqust ayından bəri ən yüksək həddə çatan dollar son zamanlar açıqlanan müsbət iqtisadi məlumatlar və Trampın seçkiləri qazanma ehtimalının artması ilə diqqət çəkir. Bu ayın əvvəlində açıqlanan güclü məşğulluq rəqəmləri ABŞ Federal Ehtiyat Sisteminin (FED) faiz endirimi gözləntilərinin geri çəkilməsinə səbəb olub.

Sentyabrın sonundan etibarən dollar rəqib valyutalar qarşısında təxminən 4% dəyər qazanıb. Analitiklər Trampın noyabrın 5-də keçiriləcək seçkilərdə qalib gələcəyi təqdirdə idxal tariflərinin artırılmasının qısa müddətdə dolları dəstəkləyəcəyini proqnozlaşdırır. Bu tariflərin ABŞ iqtisadiyyatında inflyasiya və siyasət faiz dərəcələrini artıracağı gözlənilir.

Keçmiş prezident Tramp tez-tez bəyan edir ki, dolların dəyəri aşağı düşməlidir. Ancaq ümumi gözlənti var ki, respublikaçılar Ağ Ev və Konqresdə qalib gəlsələr, həyata keçiriləcək iqtisadi siyasətlər dolları gücləndirəcək.

Aysel Şahmar