Dövlət büdcəsinin gəlirləri KƏSKİN ARTDI

2025-ci ilin yanvar-may aylarında dövlət büdcəsinin gəlirlərinin icrasında yüksək göstəricilər qeydə alınıb, xərclərlə əlaqədar 550 mindən çox ödəniş tapşırığı yerinə yetirilib. Cari ilin yanvar-may ayları üzrə dövlət büdcəsinin gəlirləri 17 138.0 milyon manat təşkil edib ki, bu da beş aylıq proqnozdan 639.7 milyon manat və ya 3.9% çoxdur.

Publika.a xəbər verir ki, bu barədə Maliyyə Nazirliyi məlumat yayıb.

Məlumata görə, gəlirlərdə İqtisadiyyat Nazirliyi yanında Dövlət Vergi Xidmətinin xətti ilə daxilolmalar 7 843.3 milyon manat təşkil edərək proqnozdan 423 milyon manat və ya 5.7%, Dövlət Gömrük Komitəsi üzrə daxilolmalar 2 589.5 milyon manat təşkil edərək proqnozdan 2.5 milyon manat və ya 0.1%, İqtisadiyyat Nazirliyi yanında Əmlak Məsələləri Dövlət Xidməti üzrə daxilolmalar 18 milyon manat təşkil edərək proqnozdan 3.7 milyon manat və ya 25.9 faiz, Dövlət Neft Fondundan transfert isə 6 033.8 milyon manat təşkil edərək proqnoza qarşı 100 faiz və sair daxilolmalar isə 398.4 milyon manat təşkil edərək proqnozdan 297.2 milyon manat və ya 3.9 dəfə çox icra edilib. Dövlət büdcəsindən maliyyələşən təşkilatların ödənişli xidmətlərindən daxilolmalar 255 milyon manat təşkil edərək proqnoza qarşı 86.7 milyon manat və ya 25.4% az icra edilib.

2025-ci ilin beş ayı üzrə dövlət büdcəsinin xərcləri 14 195 milyon manat proqnoza qarşı 13 691.8 milyon manat, yaxud 96.5% icra edilib.