Bakıda üç nəfər tərəfindən bıçaqlanan qadın danışdı - TƏFƏRRÜAT/YENİLƏNDİ

Bakının Sabunçu rayonunda qadının bıçaqlanması ilə bağlı yeni təfərrüatlar məlum olub.

Hadisə zamanı bıçaq xəsarətləri almış D.Əsgərova Publika.az-a bildirib ki, 7 aydır iki qızı ilə birgə başqa bir ünvanda kirayədə yaşayır.

Onun sözlərinə görə, əri Namiqlə konfliktə səbəb övladlarını məktəbə qoymaması olub:

"Buna etiraz edəndə Namiq məni döyürdü. Ötən gün Xırdalanda mediasiyaya müraciət etdim ki, rəsmi şəkildə ondan ayrılım. Bu ərəfədə ərimin evimizi satdığını, hətta beh aldığını eşitdim. Evə gəlib etiraz edəndə ərim, qayınatam və baldızımın oğlu mənə bıçaqla xəsarətlər yetirdilər".

Ətraflı səsyazısında:

xxx

Bakının Sabunçu rayonunda qadını bıçaqlayan şəxsin kimliyi məlum olub.

Publika.az-ın xəbərinə görə, Sabunçu rayonu ərazisində 1997-ci il təvəllüdlü D.Əsgərovaya kəsici-deşici alətlə xəsarət yetirilməsi barədə polisə məlumat daxil olub.

Qadının əməli törətməkdə şübhəli bilinən 1990-cı il təvəllüdlü əri N.Əsgərov polis əməkdaşları tərəfindən müəyyən olunaraq saxlanılıb.

Faktla bağlı araşdırma aparılır.

Qeyd edək ki, ilkin məlumatda qadını qayınatasının bıçaqladığı iddia olunurdu.

xxx

Sabunçu rayonunda boşanmaq istəyən gəlin bıçaq xəsarətləri ilə xəstəxanaya yerləşdirilib.

Publika.az-ın xəbərinə görə, hadisə Qanbay Vəzirov küçəsində baş verib.

1997-ci il təvəllüdlü Əsgərova D. qayınanası və qayınatası ilə mübahisə zamanı bıçaqlanıb. Yaralı çoxsaylı bıçaq xəsarətləri alıb. O, ağır vəziyyətdə Sabunçu Tibb Mərkəzinə yerləşdirilib.

Yaralının yaxınlarının verdiyi məlumata görə, qadın həyat yoldaşından boşanmaq istəyib. Bu istəyini bilən qayınanası əvvəlcə onu döyüb, qayınatası isə bıçaqlayıb.