Qayınana-gəlin "ədavəti" bitdi - Pələngin hücumu onları barışdırdı

Hindistanın Uttarakhand ştatında 50 yaşlı qadın pələngin hücumuna məruz qalan 67 yaşlı qayınanasını xilas edib.

Publika.az xəbər verir ki, hadisə Kunkhet kəndi yaxınlığındakı meşədə baş verib. Moxani Devi və qayınanası Basanti Devi mal-qara üçün ot toplamaq məqsədilə meşəyə gediblər. Bu zaman kolluqdan çıxan pələng yaşlı qadına hücum edib.

Moxani Devi özünü itirməyərək əlindəki oraqla vəhşi heyvana zərbə endirib. Gözlənilməz müqavimətlə üzləşən pələng Basanti Devini buraxaraq meşənin dərinliyinə qaçıb.

Ağır xəsarətlər alan 67 yaşlı qadın reanimasiyaya yerləşdirilib. Həkimlər onun vəziyyətinin stabil olduğunu bildiriblər.

Zərərçəkənin oğlu Puran Çandra müalicə xərclərinin dövlət tərəfindən ödənilməsini və pələngin tutulması üçün əraziyə tələ quraşdırılmasını tələb edib. Kənd sakinlərinin sözlərinə görə, yırtıcı bazar günü axşamı və bazar ertəsi səhər həmin ərazidə yenidən görünüb.

Pələngin təkrar peyda olması kənddə ciddi narahatlıq yaradıb. Sakinlər dərhal tələ quraşdırılmasa, Ranikhet-Ramnaqar magistral yolunu bağlayacaqlarını bildiriblər. Yerli hakimiyyət isə qəfəsin quraşdırılacağını və ailəyə qanunvericiliyə uyğun bütün lazımi yardımın göstəriləcəyini vəd edib.

Müəllif: Adəm