İdman

"Qarabağ"ın hazırlıq planı müəyyənləşdi

12 İyun 2024 15:01

"Qarabağ"ın hazırlıq planı müəyyənləşib.

Publika.az xəbər verir ki, Azərbaycan çempionunda yay fasiləsi iyunun 18-də başa çatacaq. Hazırlığın ilk mərhələsinə həmin tarixdən Bakıda start veriləcək. Millilərin üzvü olan futbolçular komandanın hazırlığına ayın 23-də qoşulacaqlar.

Paytaxtdakı toplanış çərçivəsində 2 yoxlama oyununun keçirilməsi planlaşdırılır. Bu görüşlərin iyunun 29-da və iyulun 2-də təşkil olunması nəzərdə tutulub.

Hazırlıq prosesinin ikinci mərhələsi Avstriyada gerçəkləşəcək. Ağdam təmsilçisi iyulun 5-dən 17-dək Tirol bölgəsində təlim-məşq toplanışı keçirəcək. Hazırlıq çərçivəsində 2 oyun günündə ümumilikdə 4 yoxlama görüşü təşkil olunacaq. Bu matçlardan ikisi iyulun 9-da, ikisi də 16-da baş tutacaq.

"Qarabağ" üçün yeni mövsüm iyulun 23-də və ya 24-də başlayacaq. Komanda həmin gün UEFA Çempionlar Liqasının 2-ci təsnifat mərhələsi çərçivəsində ilk oyununu keçirəcək. Mərhələnin püşkü isə iyunun 19-da atılacaq.

Heybət