İdman

"Kəpəz" 1000-ə çatdı: Yalnız "Neftçi" və "Qarabağ"...

2 Sentyabr 2024 16:33

“Kəpəz” Azərbaycan çempionatlarında 1000-ci qolu vurub.

Publika.az PFL-in saytına istinadən xəbər verir ki, bu, Azərbaycan Premyer Liqasının 5-ci turuna təsadüf edib. “Sabah”la Tovuz şəhər stadionunda keçirilən ev oyununda 2:3 hesabı ilə uduzan Gəncə təmsilçisinin ilk qolu yubiley xarakteri daşıyıb.

“Kəpəz”in 1000-ci qolunu Viktor Braqa vurub. Bu rəqəmi 1001-ə də çatdıran komanda 651-ci oyununda buna nail olub. Gəncə təmsilçisinin orta məhsuldarlığı 1,54-ə bərabərdir.

“Kəpəz” evdə 619, səfərdə 372, neytral meydanda 10 qola sevinib. Qərb təmsilçisi Azərbaycan çempionatları tarixində 1000 və daha çox qol vuran 3-cü komandadır. Yalnız “Neftçi” və “Qarabağ” daha çox fərqlənib.

Qeyd edək ki, “Kəpəz”in ilk qolunu 1992-ci il mayın 3-də “Turan”la ev oyununun (2:1) 21-ci dəqiqəsində Cavid Əhmədov vurub.

Heybət