Ronaldonun ölkəsini fəth edən azərbaycanlı: Bu, düşünməkdən əl çəkə bilmədiyim arzudur - EKSKLÜZİV MÜSAHİBƏ

Bu idman növü ilə maraqlanmağa başladığım vaxtlardan onun iştirakçıları haqqında eşirdirdim: Onların sayı kosmonavtlar qədərdir. Əvvəllər bu sözlər mənə qəribə gəlirdi. Zaman keçdikcə bunun real olduğunu anladım. Bizə nə qədər qəribə gəlsə də, onların sayı çox az imiş.

Söhbət avtoidman şahı olan “Formula 1” və bu idmanın növünün qəhrəmanları olan pilotlarından gedir. İllər ərzində treklərdə 20, ən yaxşı halda isə 22-23 pilot yarışır. Təsəvvür edin ki, dünya üzrə “Formula 1”-də 10 komanda var. Yeni mövsümdən bu say 11-ə çatacaq. Tarixə nəzər salsaq, fikrimizdə yanılmadığımızı görərsiniz. Nə qədər bahalı idman növü olsa da, sürətli yollardan baş açan sürücülər bir o qədər də azdı. Düzdür, “Formula” seriyasında daha 3 kateqoriya üzrə mübarizə var. Lakin o yarışlarda da iştirakçı sayı elə də çox deyil.

Azərbaycan da artıq 10 ilə yaxındır “Formula” yarışlarının məskəninə çevrilib. Ən gözəl və sürətli treklərdən biri məhz Bakıdadır. Hər il dünyanın diqqəti paytaxtımızda olur. Çünki burada tez-tez süprizlər qeydə alınır.

Yəqin ki, Azərbaycan Qran-Prisində yerli pilot iştirak etsəydi, bu, bizim üçün daha gözəl olardı. Yarışın populyarlığı və azarkeş marağı artardı. Hazırda bu arzumuz real görünməsə də, gələcəkdə vəziyyət dəyişə bilər. Çünki “Formula” yarışlarında iştirak etməyə namizəd olan soydaşımız var. Onlardan biri kartinq yarışlarının ulduzuna çevrilən Davin Cəfərovdur.

Onun haqqında yeni məlumat almağa başlamışıq. Avqust-sentyabr aylarında iştirak etdiyi turnirlərdə uğur qazanmasından xəbər tutmuşduq. Bu ay isə 24-cü dünya kartinq çempionatında 8-ci olmağı bacarıb. 32-ci yerdən start götürən Cəfərov yarımfinal və final mərhələlərinə yüksəlib. O, finalda 24 ötmə edərək italyan pilot Lorentso Pinanellinin 14 ötməlik rekordunu qırıb və eyni zamanda yarışın ən sürətli dövrəsini (fastest lap) nümayiş etdirib.

Bundan sonra Davin Cəfərovla maraqlanmağa və onun haqqında məlumat tapmağa çalışdıq. Nəticədə Portuqaliyada yaşayan 16 yaşlı həmyerlimizlə həmsöhbət olduq. Davin Publika.az-a eksklüziv müsahibəsində karyerasından, arzularından və gələcək planlarından danışdı.

- Hər kəsə Davin Cəfərovun kim olması maraqlıdır. Çünki bu ad Azərbaycan idmanında yeni parlamağa başlayıb. Əvvəlcə siz yaxından tanıyaq...

- Milanda anadan olmuşam, hər iki valideynim azərbaycanlıdır. İtaliyadan sonra bir neçə ölkəyə köçdük və hazırda Portuqaliyanın Lissabon şəhərində yaşayırıq. Uşaqlığımdan idmanı sevmişəm, peşəkar üzgüçülük, basketbol və yüngül atletika üzrə bir çox yarışlarda iştirak etmişəm. 30-dan çox medal və kubokum var. Amma motorsport mənim üçün ümumilikdə bir nömrəli idman növünə çevrilib və mən bu idman növünü peşəkar karyera kimi seçdim. Motor idmanında arzum və hədəflərim var. Arzum ölkəmi dünyanın ən çətin idman növlərindən biri olan “Formula 1”-də təmsil etməkdir. Tarixdə Azərbaycan bayrağı ilə Azərbaycan Qran Prisində yarışan ilk şəxs olmaq istəyirəm və bu arzuma çatmaq üçün hər şeyi edəcəyəm.

- Kartinq Azərbaycanda populyar olsa da, yalnız həvəskar səviyyəni əhatə edir. Bəs peşəkar kartinqdə vəziyyət necədir? Bu, avtoidman karyerası arzusunda olanlara nələr vəd edir?

- Kartinqin populyarlığı Azərbaycanda artmaqdadır, lakin o, hələ də əsasən həvəskar səviyyəyə yönəlib. Hələ ki, avtoidman mədəniyyətinin formalaşdığı ölkələrdə olduğu kimi eyni infrastruktur, yarış məktəbi, rəqabət dərinliyi və beynəlxalq təsirə malik deyil. Mənim kimi “Formula 1”-ə çatmağı arzulayan gənc Azərbaycan pilotları üçün ən yaxşı sürücülərlə yarışmaq və ən yüksək səviyyələrdə təcrübə qazanmaq üçün xaricə getmək lazımdır. Bu, çətin olsa da, həm də dözümlülük, uyğunlaşma və qətiyyəti inkişaf etdirir. Azərbaycanda peşəkar kartinq hələ ilkin mərhələdədir, lakin dəstək və ambisiya ilə beynəlxalq avtoidman uğuruna aparan əsl yol ola bilər. İnanıram ki, bu məsələ tezliklə həll olunacaq. Ölkəmizin həvəsli kartinq sürücüləri dəstəklənəcək və onların inkişaf üçün öz yolu olacaq.

- Son zamanlarda yarışlarda Azərbaycanı təmsil edirsiniz. Dünya çempionatında da ölkəmizin adından çıxış etdiniz. Bəs Azərbaycanla, Azərbaycan Avtomobil Federasiyası ilə əlaqələriniz var?

- Bəli, yarış səyahətimdə böyük bir addım olan dünya çempionatı da daxil olmaqla, Azərbaycanı beynəlxalq yarışlarda təmsil etmək şərəfinə nail oldum. Bir çox maneələrə baxmayaraq, avtomobilin potensialını maksimum dərəcədə artırmağı bacardım və yağışlı havada 24 sürücünü ötərək bacarıqlarımı nümayiş etdirdim. Bu hadisə çox böyük təəccüblə qarşılandı. Xüsusilə, keçən il 14 ötmə edən italyan sürücü Lorenzonun rekordunu yenilədim. Bununla belə, hər yarışın cəmi 15 dövrədən ibarət olduğunu və 32-ci yerdən başlayaraq 1-ci yeri tutmaq üçün kifayət etmədiyini qeyd etmək vacibdir. Azərbaycan Avtomobil Federasiyası mənə çox böyük dəstək verir. Fürsətdən istifadə edib Azərbaycan Avtomobil Federasiyasının rəhbərliyinə göstərilən dəstəyə görə bir daha dərin təşəkkürümü bldirirəm. Peşəkar kartinq ölkəmizdə nisbətən yeni bir sahə olduğundan, xaricdə Azərbaycan bayrağı ilə yarışan yeganə azərbaycanlıyam. Məqsədim təkcə ölkəmi təmsil etmək deyil, həm də gələcək nəsil idmançılara ilham vermək və motor idmanının ən yüksək səviyyələrinə çata biləcəyimizi göstərməkdir.

- Avtoidmanın şahı hesab edilən “Formula” seriyasına keçmək imkanınız və ya təklifləriniz var?

- “Formula” kateqoriyalarına keçmək üçün təklif almışam. Bu da böyük bir nailiyyətdir. Dəvətsiz ora düşmək çox çətindir. Həm bacarıq səviyyəm, həm də alacağım dəstək səviyyəsi baxımından bu vacib addıma tam hazır olduğumu hiss edirəm. Kartinqdən “Formula”-ya keçid çox əhəmiyyətlidir və mən bunu həm effektiv, həm də səmərəli şəkildə həyata keçirməyə qərarlıyam. Bu, əhəmiyyətli bir fürsət və eyni zamanda məsuliyyət yaradır ki, mən təcrübəli pilot kimi inkişafımı təmin edəcək ən uyğun yolu diqqətlə qiymətləndirim.

- “Formula” yarışları olduqca bahalıdır. Orada yarışmaq, məşq etmək, xərcləri qarşılamaq, səfərlər etmək və başqa vacib məqamlar var. Bütün bu xərclərindən öhdəsindən necə gələ biləcəksiniz? Dəstəyə ehtiyac olacaq?

- Bu, şübhəsiz ki, ən böyük çətinliklərdən biridir. Motorsport, xüsusən də "Formula" yarışlarına keçid olduqca bahalıdır. Sponsorlara çox ehtiyacım var, çünki maddi dəstək olmadan yarış karyeramı davam etdirmək çox çətin olacaq. Hər bir sınaq praktikalari, yarışlar, avadanlıqlar, mexaniklər, komanda, səyahət və s. Bütün bunlar böyük xərclər tələb edir. İndi diqqətim mənim vizyonumu bölüşən və azərbaycanlı sürücünün idmanın ən yüksək səviyyələrinə yüksəlməsinə kömək edə biləcək sponsorlar tapmağa yönəlib. Müvafiq maliyə dəstəyi olarsa, məqsədlərimə çatacağıma əminəm. Nümayiş etdirdiyim təsirli və potensial nəticələrə əsaslanaraq sponsorluq məsələsinin tezliklə həll olunacağına olan ümidimi itirmirəm. Nəticədə, inanıram ki, “Formula 1”-ə yüksələndə nailiyyətlərim sponsorlar üçün əhəmiyyətli bir gəlirli investisiyaya çevriləcək.

- “Formula 1”-də Azərbaycanın təmsil olunmasının həm sizə, həm də ölkə ölkə idmanına nə qədər faydalı ola bilər?

- “Formula 1”-ə yüksəlmək həm milli, həm də şəxsi səviyyədə böyük əhəmiyyət kəsb edir. Azərbaycan idmanı üçün bu böyük bir tarixi uğur və Azərbaycan pilotlarının avtoidmanın zirvəsində yarışdığı ilk hadisə olacaq. Azərbaycanlı pilotun “Formula 1”-ə yüksəlməsi ölkə idmanı adına böyük tarixi nailiyyət sayılacaq. Mənim üçün isə bu, illərlə davam edən fədakarlığın və bu idman növünə sədaqətin kulminasiya nöqtəsi olardı.

- “Formula” yarışlarını yəqin ki, diqqətlə izləyirsiniz. Kumiriniz, çıxışına heyran olduğunuz pilot var? Və hansı trek(lər)də çıxış etməyi arzulayırsınız?

- Mənim sevimli F1 pilotum olmasa da, hər birinə dərin heyranlıqla yanaşıram, onların özünəməxsus üslubunu, valehedici hekayələrini və sarsılmaz gücünü bilirəm. Hər birinin öz tərzi, hekayəsi və gücü var ki, bu da mənim inkişafım və təkmilləşməm üçün daimi ilham mənbəyidir. Ən çox yarışmaq istədiyim bir trası seçməli olsaydım, şübhəsiz ki, bu Bakı olardı. Geyimimdə və maşınımda Azərbaycan bayrağı və şəhərimizin trasında təxminən 360 km/saat sürətlə doğma küçələrdə yarışmaq - bu, düşünməkdən əl çəkə bilmədiyim bir xəyaldır. Bu, həyatımın ən emosional və unudulmaz anı olardı. Həm yaş, həm də quru şəraitdə Bakı trekində dövrə vurmaq üçün daim peşəkar simulyatorumda məşq edirəm. Hazırkı ən yaxşı göstəricim 1:39.5-dir ki, bu da çox sürətlidir, amma yenə də bacarıqlarımı təkmilləşdirirəm ki, “Formula 2”-yə çatanda vətənimdə qalib gəlməyə 100% hazır olum.

- İtaliyanın ən gözəl şəhərlərindən olan Milanda doğulmusunuz, lakin hazırda Portuqaliyada yaşayırsınız. Hara sizin üçün daha doğmadır?

- Deyərdim ki, hər iki yer mənim bir hissəmdir. Həyatımın təxminən yarısını İtaliyada yaşamışam, bu, mənim erkən yaşlarıma təsir göstərib və ilk dəfə avtoidman mədəniyyəti ilə tanışlığımı təmin edib. Amma peşəkar pilot kimi böyüməyə başladığım yer Portuqaliyadır. Milan həmişə nostalji hisslər oyada bilsə də, Portuqaliya motoidman səyahətimin başlanğıcı kimi qalır. Harada olmağımdan asılı olmayaraq, Azərbaycan mənim vətənimdir! Məni irəli aparan və məqsədlərimə çatmağa motivasiya edən sarsılmaz ilham mənbəyimdir.

- Bütün dünyada daha çox Kriştiano Ronaldonun ölkəsi kimi tanınan Portuqaliyada futbolu deyil, avtoidmanı seçmək qərarına necə gəldiniz?

- Düzdür, Portuqaliya futbolla nəfəs alır və demək olar ki, hər kəs növbəti Ronaldo olmağı xəyal edir. Mənim şəxsi fikrim budur ki, bir çox futbol komandaları var, amma “Formula 1”-də dünya üzrə cəmi 20 pilot var. Məni həm zehni, həm də fiziki olaraq məqsədlərimə çatan bir idmançı olmaq istəyirəm. Motorsport mənə bunu verir. Saatda 360 kilometri aşan sürətlərə çatmağın həyəcanı, tələb olunan dəqiqlik, daxili risk və adrenalin axını. Bu sahədə ölkəmdən ilk olmaq istəyi məni daha çox həyəcanlandırır. Bu istəyin böyük təzyiqi altında zirvədə çıxış etməyə və əvvəllər qeyri-mümkün hesab edilənə nail olmağa qərarlıyam.

- Bizdə olan məlumata görə, Portuqaliyada kino sənayesinin də diqqətini cəlb etmisiniz. Bu, sizə gələcəkdə marketinq baxımından uğur gətirə bilər?

- Palmela beynəlxalq trekində “Tag Livre” kateqoriyasnda birinci yer qazandım, podiumdan sonra Portuqaliyada bir film layihəsində iştirak etməyə dəvət aldım. Mənə Aleksandra Lenkastre, Dioqo İnfante, Ana Quiomar və Joze Kondessa kimi ən məşhur portuqal aktyorlarla birlikdə rol almaq şansı təklif edildi. Bu aktyorların bəziləri “Netflix” filmlərində və seriallarında rol alıblar. Layihədə mən kartinqlə əlaqəli bir epizodda antaqonist rolunu oynadım, burada qəhrəman yarışda qalib gəlir və mən ikinci yeri tuturam. Bu, yarışa olan ehtirasımı fərqli bir performansla birləşdirən həyəcanlı bir təcrübə idi. Rejissorun hazır ssenarisi var idi, amma mən real və peşəkar bir yanaşma təklif etdim və bu, qəbul edildi. Bu imkanlar, xüsusən də sponsorları cəlb edərkən və ictimai imic formalaşdırarkən marketinq baxımından kömək edə bilər.

Heybət Məmmədov