Qurban Qurbanov: Futbolçularımla fəxr edirəm

“Azarkeşləri təbrik edirəm. Qarşıdan bizim üçün önəmli olan Zəfər bayramı gəlir. Nəticədən daha çox, oyundan, futbolçularımın döyüşkənliyindən razı qaldım. Onlarla fəxr edirəm”.

Publika.az xəbər verir ki, bu sözləri “Qarabağ”ın baş məşqçisi Qurban Qurbanov deyib.

Təcrübəli mütəxəssis UEFA Çempionlar Liqasının 4-cü turunda “Çelsi” ilə ev oyununda qeydə alınan heç-heçəni (2:2) belə şərh edib:

“Belə qələbələr bizi böyüdür, hamını həvəsləndirir. Qarşıdakı oyunlara hazırlaşmalıyıq. Ciddi rəqiblərimiz var. Vaxt gəldikcə onlar haqqında düşünməliyik. Xalımızın üstünə xal gəlibsə, bunu qazanmış kimi hesab edirəm. Bu, xal itkisi deyil”.

Qurbanov komandasının pley-off şanslarını da dəyərləndirib:

“İlk gündən söyləşmişdim ki, indiki “Qarabağ” çox fərqlidir. Amma heyətdə yeni futbolçularımız vardı. Onların bir çoxu nə çempionluq, nə də avrokubok görmüşdülər. Buna görə narahat idim. Böyük komandalara qarşı oynamamışdılar. Çox şükür ki, hər şey yaxşı alındı. Biz ilk gündən Çempionlar Liqasına düşəcəyimizə inanırdıq. Bu alındı. Pley-offa gəlincə, bizim belə bir şansımız varsa, bunun reallaşması üçün əlimizdən gələni edəcəyik. Bunun üçün çox çalışmalıyıq. Çünki bundan sonrakı rəqiblərimiz bizə qarşı diqqətli olacaqlar. Onların da xallara ehtiyacı olacaq”.