“Mançester Yunayted”dəki uğursuz günlərini xatırladı

“Betis”in vingeri Antoni sabiq klubu “Mançester Yunayted”ə keçidi zamanı onun üçün qoyulan transfer qiymətindən danışıb.

Publika.az xəbər verir ki, braziliyalı hücumçu İngiltərə klubunun ən bahalı transferlərindən biri olmanın gətirdiyi gözləntilərdən qaçmadığını bildirib:

“Əgər sənə 100 milyon avro ödəyirlərsə, təzyiq çox böyük olur, amma mən öz keyfiyyətimi bilirəm. Mənim xüsusi bacarıqlarım var idi. 100 milyon avroya fokuslanmamışdım, mən oraya çatmaq üçün keçdiyim yolun üzərində düşünürdüm”.

O, həmçinin etiraf etdi ki, kənar gözləntilər çox yüksək olub və şəxsi çətinliklər onun “Old Trafford”dakı çıxışına təsir edib:

“Təbii ki, mənim də məsuliyyətim var, bunu min dəfə demişəm. Başqa yerlərdə bəzi şeylərdən keçdim və o zaman mənim ruh halım ən yaxşı vəziyyətdə deyildi. Amma həyatdakı hadisələr prosessin bir hissəsidir. Çətin olsa da, onu yaşamalı idim.”

Uğursuz sonluğa baxmayaraq, Antoni Mançesterdəki vaxtının müsbət tərəflərini də qeyd edib:

“Çox yaxşı anlar da oldu. Mən titul qazandım, əla dostlarım var… Bütün bunlar ömürlük mənimlə qalacaq.”