“Real” və PSJ “Bavariya”nın ulduzuna görə hərəkətə keçdi

Dayot Upamekano ilə “Bavariya” arasında yaşanan müqavilə böhranı fonunda “Real” və PSJ fransalı müdafiəçinin tələblərini qarşılamağa hazırdır.

Publika.az xəbər verir ki, bu barədə BILD məlumat yayıb.

“Bavariya” Upamekanonun gələn yay başa çatacaq müqaviləsini uzatmağa çalışsa da, danışıqlarda irəliləyiş yoxdur. Bildirilir ki, tərəflər bir neçə həftədir heç bir nəticə əldə etməyib.

Upamekano illik 20 milyon avro məvacib və buna yaxın məbləğdə imza bonusu tələb edir. Futbolçunun nümayəndələri isə tələsmir və danışıqları mövsümün sonuna qədər uzatmağa hazırdır.

Münhen klubu 27 yaşlı müdafiəçini layihədə saxlamağa üstünlük verir, lakin danışıqlarda onun sərt şərtlərinə boyun əymək istəmir.

PSJ və “Real” isə həm maliyyə gücünə, həm də cazibədar idman layihəsinə malikdir və bu amillər fransalı müdafiəçini transfer etməyə imkan yaradır.

Madrid klubu yeni mərkəz müdafiəçisi axtarır. David Alabanın yayda ayrılması ehtimalı və Antonio Rüdigerin qeyri-müəyyən gələcəyi bu ehtiyacı daha da artırır.