Prezidentin məhkəmədə verdiyi ifadə yayıldı - Onları tanımırmış

“Barselona”nın prezidenti Joan Laportanın məhkəmədə verdiyi ifadə yayılıb.

Publika.az xəbər verir ki, Laporta Xose Mariya Enrikes Neqreyra və onun oğlunu şəxsən tanımadığını bildirib.

Laporta, hakim hesabatlarını hazırlayan şirkətə ödənişlər barədə 2003-cü ildə klub prezidenti seçildikdən sonra məlumat əldə etdiyini, lakin onun kimə məxsus olduğu barədə məlumat verilmədiyini deyib.

“Mən Neqreyranı şəxsən tanımırdım. Mənə dedilər ki, orada hakimlik üzrə məsləhətçi var və biz onların xidmətlərindən istifadə etməyə davam etdik, çünki onları faydalı hesab edirik.

Sadəcə 18 il ərzində 7,3 milyon avro ödənildiyindən danışırıq. Gəlin bunu kontekstə salaq. Düşünmürəm ki, idman sektoru üçün vacib və faydalı olan bu xidmətlər üçün yüksək qiymətdir.

Bilirəm ki, hesabatlar cənab Neqreyranın oğlu tərəfindən hazırlanıb və cənab Neqreyra keçmiş hakim olub. Bildiyim tək şey budur”, – Laporta dedi.

Laportadan 2003-cü ildən 2010-cu ilə qədər “Barselona”nın prezidenti kimi ilk müddətinə aid hesabatlar barədə soruşulduqda, həmin sənədlərin artıq mövcud olmadığını söyləyib.

“Sonrakı dövrlərə aid təxminən 629 hesabat tapılıb. Prezidentliyim dövründən qalanlar… Nəzərə alın ki, sənədlər hər beş ildən bir məhv edilir.

Bu hesabatları demək olar ki, təsadüfən tapdıq, onlar şkafın arxasında, bəzi qutuların içində idi.

Bizdə ətraflı fakturalar var, onlar ətraflı şəkildə qeyd olunub, uçota alınıb, vergi orqanları tərəfindən nəzərdən keçirilib və audit olunub”, – “Barselona”nın prezidenti bildirib.

Xatırladaq ki, 2023-cü ildə “Barselona” və onun rəhbərliyi İspaniya Kral Futbol Federasiyasında (RFEF) çalışmış və Hakimlərin Texniki Komitəsinin (CTA) keçmiş vitse-prezidenti Xose Mariya Enrikes Neqreyraya ödənişlərdə rüşvət verməkdə ittiham olunub.

Məhkəmə “Barselona”nın 2001-2018-ci illər arasında Neqreyraya 7,7 milyon avro ödəməsinin cinayət təşkil etdiyini müəyyən edib.