Ulduz futbolçu rəsmən açıqladı: "Siti"dən ayrılır

“Mançester Siti”nin yarımmüdafiəçisi Bernardo Silva mövsümün sonunda İngiltərə təmsilçisindən ayrılacağını rəsmən açıqlayıb.

Publika.az xəbər verir ki, o, bu münasibətlə klub və azarkeşlərə vida məktubu paylaşıb.

“Şəhərlilər, buraya 9 il əvvəl gələndə həyatda uğur qazanmaq və böyük məqsədlərə çatmaq istəyən balaca bir oğlanın arxasınca gəlirdim. Bu şəhər və bu klub mənə gözlədiyimdən daha çoxunu verdi. Birlikdə qazandığımız uğurlar və titullar, bu miras həmişə qəlbimdə qalacaq. 100 xal topladığımız mövsüm, daxili "dördlük", trebl, ardıcıl dörd çempionluq və daha çoxu… Pis olmadı.

Bir neçə ay sonra həm klub olaraq çox şey qazandığımız, həm də ailə qurduğum və evliliyimə şahid olan bu şəhərlə vidalaşma vaxtı gələcək. Ürəkdən təşəkkür edirəm!

Azarkeşlər, illər boyunca göstərdiyiniz dəstək heç vaxt unudulmayacaq. Mənim əsas məqsədim həmişə meydanda ehtirasla oynamaq və sizi qürurlandırmaq olub. Ümid edirəm ki, bunu hər oyunda hiss etmisiniz. Mən “Mançester Siti”yə bir oyunçu kimi gəldim, amma klubun əbədi azarkeşi kimi ayrılıram.

Kluba, Pepə, heyətə və bütün komanda yoldaşlarıma bu 9 il üçün təşəkkür edirəm. Bu ailənin bir hissəsi olmaq mənim üçün böyük şərəf idi. Gəlin, bu son həftələrdən zövq alaq və bu mövsümün bizə verə biləcəyi uğurlar üçün mübarizə aparaq”, - deyə Silva "X "sosial şəbəkəsində yazıb.

Qeyd edək ki, 31 yaşlı portuqaliyalı futbolçu mövsümün sonunda azad agent kimi komandadan ayrılacaq.

Heybət