İdman

Dünya çempionatının açılışında BƏDBƏXT HADİSƏ

12 İyun 2026 03:13

Meksika və CAR yığmaları arasında keçirilən dünya çempionatının açılış oyunundan bir neçə dəqiqə əvvəl "Asteka" stadionu yaxınlığında huşunu itirən azarkeş dünyasını dəyişib.

Publika.az xəbər verir ki, bu barədə jurnalist Patrisiya Estrada "X" sosial şəbəkəsindəki səhifəsində məlumat yayıb.

İlkin məlumatlara görə, azarkeşin halı stadion ətrafındakı istidən pisləşib. Həkimlər dərhal ona ürək-ağciyər reanimasiyası göstərərək xəstəxanaya çatdırıblar. 40 yaşlı kişidə ürəktutması baş verib və o, sonradan vəfat edib.

Dünya çempionatının açılış matçında ev sahibi Meksika yığması CAR komandasını 2:0 hesabı ilə məğlub edib. Oyunda qolları 9-cu dəqiqədə Xulian Kinyones və 67-ci dəqiqədə Raul Ximenes vurublar.

Görüşdə üç qırmızı vərəqə göstərilib: CAR-dan Yaya Sitxole (49-cu dəqiqə) və Txemba Zvane (84-cü dəqiqə), həmçinin Moskvanın "Lokomotiv" klubunun meksikalı oyunçusu Sesar Montes (90+2-ci dəqiqə) meydandan qovulublar.

Hüseyn İbadlı