Dilarə Əliyeva: Müğənnilər toydan toy tutur, aktyorlar isə...

“Pandemiyadan sonra ilk kommersiya filmi olaraq “5 Betər”ə çəkildim. Cəmi 5 gün ərzində 13 200 tamaşaçı toplayaraq sıçrayış elədi. Bundan bir neçə gün sonra həm “Cinema plus”, həm də “Park Cinema” eyni filmi göstərə bildi. Buna ən azından nail ola bildik və sözsüz ki, bu, milli filmlərin istehsalına çox böyük dəstək olacaq. Tamaşaçılardan “5 Betər”lə bağlı gözəl sözlər eşidirəm. Bu, bizi çox sevindirir”.

Bu sözləri Publika.az-a açıqlamasında Əməkdar artist Dilarə Əliyeva deyib. Sənətçi qeyd edib ki, “5 Betər”ə yaxşı baxış olarsa, yeni filmin çəkilişlərinə start veriləcək:

“Müğənnilər toydan toy tutur, aktyorlar isə filmlərin baxış sayından. Filmə olan maraq kino prodüserlərini də maraqlandırır və biz aktyorlar üçün öz istedadını göstərməyə meydan yaranır. Kinoteatrların açılması pandemiyada kino sahəsində donmuş vəziyyəti yavaş-yavaş əridir”.

Əməkdar artist bildirib ki, filmlərimizin “Netflix”də nümayiş olunması üçün ciddi işlər aparılmalıdır:

“Ard-arda filmlər çəkilməlidir. Üzərimizdə işləməliyik, hər dəfə daha yaxşısını çəkə-çəkə müəyyən bir yerə yaxınlaşmalıyıq. Dünya tamaşaçısının tələb və meyarlarına uyğun olması üçün ilk növbədə kapital olmalıdır. Kreativ ideyanı həyata keçirmək üçün yaxşı maliyyə lazımdır. Əgər yaxşı maliyyə olarsa, biz “Netflix”ə bir addım yaxın ola bilərik”.

Aktrisa komediya filmlərinin tənqid olunmasına da toxunub:

“Artıq kinoteatrlarda nümayiş olunan “Nazik mətləb” və bir neçə həftə sonra böyük ekranlara çıxmağa hazırlaşan “Zəhər tuluğu” dram filmidir. Bir də “5 Betər” var. Gəlin, görək nə baş verəcək?”

Aytən Məftun