İordaniya şahzadəsi Nyu-Yorklu iş adamına ərə gedir

Kral II Abdullah və kraliça Ranianın qızı, İordaniya şahzadəsi İman evlənir.

Publika.az xarici mətbuata istinadən xəbər verir ki, şahzadəninn seçimi Venesuela əsilli maliyəçi Cəmil Aleksandr Tarmiotisdir. İş adamı 25 yaşlı şahzadədən iki yaş böyükdür və Nyu-Yorkda vençur kapitalı fondunun idarəedici tərəfdaşıdır.

Kraliça Rania qızının nişanlandığı xəbərini İnstaqram səhifəsində elan edib.

“Təbriklər, əziz İman! Doğulduğun gündən bəri qiymətləndirdiyim təbəssüm həmişə sevgi hədiyyəsi olub. Cəmilə və sənə sevgi və gülüş dolu bir həyat arzulayıram!”, - kraliça qeyd edib.

Kraliça Ranianın özü də zadəgan ailəsindən deyil: o, həkim ailəsində dünyaya gəlib. Kraliça Rania 1993-cü ildə İordaniya kralı II Abdullah ilə bacısının verdiyi ziyafətdə tanış olub. II Abdullahın dediyinə görə, o, gələcək həyat yoldaşına ilk baxışdan aşiq olub. Qız əvvəlcə qarşılıq verməkdən çəkinib. Ancaq tezliklə kral gələcək həyat yoldaşının qəlbini fəth edə bilib və onlar 1993-cü ildə evləniblər. Cütlüyün dörd övladı var: oğulları Hüseyn və Haşim, qızları İman və Salma.