Nazarbayevlə Sarkisyanın telefon danışığının DETALLARI

Qazaxıstanın prezidenti Nursultan Nazarbayev Ermənistanın prezidenti Armen Sarkisyanla telefon danışığı aparıb.

Publika.az xəbər verir ki, Serj Sarkisyanın baş nazir postuna namizədliyinin irəli sürülməsi ilə aprel ayının 13-dən etibarən Ermənistanda başlayan etiraz dalğalarının sülh yolu ilə həll olunması gərəkdiyini deyən Nazarbayev hakimiyyəti əhali ilə danışıqlara səsləyib.

Nazarbayevin Armen Sarkisyanla telefon danışığının qısa məzmunu yayımlanıb. Məlumata görə, iki dövlət başçısı söhbət əsanasında Ermənistandakı vəziyyətin mövcud həll yollarını müzakirə edib.

"Ermənistanda ilk növbədə daxili siyasəti qaydasına salmaq lazımdır. Ermənistan xalqı dostcanlıdır və sülhü haqq edir. Ermənistanın konstitusiyasına uyğun olaraq hakimiyyət yaranmış böhranı aradan qaldırmaq məqsədilə bütün tərəfləri qarşılıqlı dioloqa cəlb etsin"- deyə Nazarbayev bildirib.

Xatırladaq ki, Qazaxıstan mətbuatının məlumatına görə, prezidentlərin telefon danışığı Ermənistan tərəfinin təşəbbüsü ilə həyata keçirilib.

Könül Cəfərli