Ukrayna Rusiya ilə danışıqlarda moderator seçdi: Bu ölkə mesaj daşıyan poçtalyon olmamalıdır

Ukrayna Hindistanın Rusiya ilə danışıqlarda moderator olmasını və Moskvanı sülh danışıqlarına qoşulmağa inandırmasını istəyir.

Publika.az xəbər verir ki, bu barədə ukraynalı hərbçi və diplomat Aleksandr Polişçuk “Bloomberg”ə bildirib.

Qeyd edək ki, Ukrayna hakimiyyəti artıq Yeni Dehliyə danışıqların bu ilin noyabrına qədər keçirilməsini təklif edib, lakin Hindistan hələ buna cavab verməyib.

Baş nazir Narendra Modi uzun müddətdir ki, iki tərəf arasında barışığın tərəfdarı olduğunu bəyan edir. Bundan əlavə, 2024-cü ilin avqustunda o, Kiyevə səfər edib. Lakin hökumət hələlik Ukraynanın təklifinə dəqiq cavab verməyib.

“Bizim üçün bu proses iş görürmüş görüntüsü yaratmaq məsələsi deyil. Bu gün baş verən münaqişənin reallığı bizim üçün vacibdir”, - deyə Hindistanın xarici işlər naziri Subrahmanyam Caishankar bildirib.

Aleksandr Polişçuk isə hesab edir ki, Yeni Dehli daha aktiv rol oynamalı və Rusiya ilə Ukrayna arasında mesaj daşıyan poçtalyon statusu almamalıdır.

Vazeh BƏHRAMOĞLU