Putini Macarıstan səmasında belə qoruyacaqlar: General detalları açıqladı

Rusiyanın məşhur hərbi ekspertlərindən olan aviasiya general-mayoru Vladimir Popov prezident Vladimir Putinin səmada necə qorunması barədə maraqlı fikirlər səsləndirib.

Publika.az xəbər verir ki, o, "Mk.ru" saytına müsahibəsində Vladimir Putinin Macarıstana uçuşu zamanı təxminən dörd qırıcı təyyarə ilə qorunacağını deyib.

General qeyd edib ki, yüksək vəzifəli şəxslərin, xüsusən də ölkənin bir nömrəli məmurunun uçuşları xüsusi prosedurlar əsasında həyata keçirilir. Rusiyada bununla bağlı məsələlər Federal Hava Nəqliyyatı Agentliyi (Rosaviasia) ilə birlikdə Xarici İşlər Nazirliyinin xüsusi xidməti tərəfindən həyata keçirilir.

Ekspertin fikrincə, Rusiya liderinin təyyarəsini müşayiət etmək üçün Su-30SM və ya Su-35 qırıcılarından istifadə oluna bilər. Digər ölkələr, o cümlədən ev sahibi ölkə də öz döyüş təyyarələrini prosesə cəlb edə bilər. Popov onu da vurğulayıb ki, bu cür qərarlar könüllü qəbul edilir və qarşı tərəfə hörmət əlaməti kimi baxılır.

General onu da əlavə edib ki, Putinin təyyarəsinin öz hava məkanına daxil olmasına icazə verən dövlətlər də uçuşun təhlükəsizliyini öz üzərinə götürməsi məsələsində könüllü davranacaqlar. Bu məqsədlə yerli hakimiyyət orqanları beynəlxalq uçuşlarla bağlı hava yollarını 10 dəqiqə müddətinə bağlaya bilər. Həmçinin, maraqlıdır ki, Rusiya nümayəndə heyətinin yoluna çıxa biləcək təyyarələr ya yerə endirilir, ya da onların marşrutları 50-100 km dəyişdirilir.

Tural