Lavrovdan Simonyana xəbərdarlıq - Belə seçim təhlükəlidir

Rusiya Xarici İşlər naziri Sergey Lavrov Ermənistan Milli Assambleyasının sədri Alen Simonyan ilə görüşündə İrəvanın Qərblə yaxınlaşmasının fəsadları barədə xəbərdarlıq edib.

Publika.az xəbər verir ki, bu barədə Rusiya XİN-in rəsmi "Telegram" kanalı məlumat yayıb.

XİN-in məlumatına görə, Lavrov və Simonyan iki ölkə arasındakı aktual məsələlər ətrafında "səmimi və konkret" fikir mübadiləsi aparıblar.

"Ənənəvi müttəfiqlərlə əməkdaşlığın zərərinə olaraq Qərblə yaxınlaşmağın təhlükəsi qarşı tərəfə izah edilib", - Nnazirlik qeyd edib:

Sergey Lavrov bildirib ki, Moskva Ermənistan rəhbərliyindən Rusiya ilə əlaqələrin mövcud səviyyəsini qorumaq istəyi barədə bəyanatlar eşidir. Lakin o əlavə edib ki, Avropa İttifaqından olan həmkarlar bunun tam əksi istiqamətində fəaliyyət göstərir və tərəfləri daimi seçim qarşısında qoyurlar: "Ya bizimlə, ya onlarla".

Rusiya XİN rəhbəri vurğulayıb ki, Ermənistan Rusiya Federasiyasının müttəfiqi və strateji tərəfdaşıdır. Rusiya tərəfi Moskva ilə İrəvan arasında hərbi-siyasi, ticarət-iqtisadi və mədəni-humanitar əlaqələrin gücləndirilməsinə yönəlmiş təşəbbüslərin sürətlə reallaşdırılmasına hazır olduğunu təsdiqləyib.

Hüseuyn İbadlı