Rusiyadan sərt cavab: "Tanklarımız tükənməyəcək!"

"Düşmənlərin iddialarına baxmayaraq, Rusiya Silahlı Qüvvələrinin tankları tükənməyəcək".

Publika.az xəbər verir ki, bu fikri Rusiyanın "Rostex" Dövlət Korporasiyasının Silahlanma Klasterinin sənaye direktoru Bekxan Ozdoyev TASS-a verdiyi müsahibəsində bildirib.

Mütəxəssis müsahibəsi hazırda Səudiyyə Ərəbistanında keçirilən "World Defense Show 2026" sərgisi ilə bağlı olub. Söhbət zamanı Ozdoyev rusların Xüsusi Hərbi Əməliyyat (SVO) zonası adlandırdığı müharibə bölgəsində yeni və modernləşdirilmiş hərbi texnikaların artmaqda davam etdiyi də qeyd olunub. O cümlədən, cəbhəyə T-90M "Prorıv", T-80BVM və T-72BZM tankları da çatdırılır.

"Bizim "Uralvaqonzavod" şirkəti tank istehsalını əhəmiyyətli dərəcədə artırıb. Bu texnikalar real döyüş təcrübəsinə əsaslanaraq daim təkmilləşdirilir və gücləndirilir", - deyə "Rostex" nümayəndəsi bildirib.

Onun sözlərinə görə, rusiyalı mütəxəssislər texnikaların döyüş qabiliyyətini və davamlılığını əhəmiyyətli dərəcədə yaxşılaşdıra biliblər. Bundan əlavə, zədələnmiş tankların tez bir zamanda xidmətə qaytarılmasına imkan verən mürəkkəb nəqliyyat vasitələrinin bərpası və təmiri sistemi də hazırlanıb.

"Düşməni məyus etməliyəm: tanklarımız tükənməyəcək!", - deyə Ozdoyev bir daha vurğulayıb.

Tural