SEPAH bütün dünyanı hədələdi: Müharibə hələ bitməyib, məhv edərik

İran İslam İnqilabı Keşikçiləri Korpusunun (SEPAH) briqada generalı İbrahim Cabbari Körfəz bölgəsində gərginliyin artması ilə bağlı sərt açıqlama verib.

Publika.az xəbər verir ki, onun sözlərinə görə, əgər vəziyyət bu şəkildə davam edərsə, “enerji bazarı deyə bir şey qalmayacaq”.

Cabbari bildirib ki, ABŞ və müttəfiqlərinin bölgədəki fəaliyyəti, xüsusilə də Hörmüz boğazında artan hərbi varlığı İranı daha sərt addımlar atmağa məcbur edə bilər. O vurğulayıb ki, İranın bölgədəki strateji imkanları istənilən anda enerji nəqliyyatını iflic edə bilər. Yəni İran Fars körfəzində enerji tranzitini əngəlləyə biləcək variantlardan istifadə edəcək.

“Biz hələ də müharibədəyik və savaş bitməyib. Müharibənin dayandırılması qarşı tərəfin zəifliyi və acizliyi ilə bağlı olub. Düşmənlər bilməlidir ki, İran yalnız sözlə kifayətlənməz. Əgər məcbur etsələr, dünya enerji bazarını sarsıdacaq addımlar atmaqdan çəkinməyəcəyik”, – Cabbari əlavə edib.

Qeyd edək ki, Hörmüz boğazı dünyada neftin əsas nəqli marşrutlarından biri sayılır. Buradan gündəlik təxminən 20 milyon barel neft daşınır. İranın bu bölgədə hərbi aktivliyi və təhdidləri enerji bazarlarında ciddi narahatlıq yaradıb.

Akqabay