İsrail dediyindən dönmür: Yenidən İrana hücum etməyə hazırlaşır

İsrail İranın nüvə proqramında yenidən aktivlik müşahidə edəcəyi təqdirdə, hərbi əməliyyatlara başlamağa hazırlaşır.

Publika.az xəbər verir ki, bu barədə “Axios” nəşri məlumat yayıb.

Netanyahunun baş müşaviri Ron Dermer qapalı brifinqlərdə Vaşinqtona səfəri zamanı Tramp administrasiyasının müəyyən şərtlər daxilində İrana yeni zərbələri dəstəkləməyə meylli olacağı təəssüratının olduğunu bildirib. Mümkün səbəblərdən biri Tehranın zədələnmiş nüvə obyektlərindən yüksək dərəcədə zənginləşdirilmiş uranı çıxarmaq cəhdi ola bilər. Hərbi cavabın başqa bir ssenarisi zənginləşdirmə obyektlərinin işə salınması da daxil olmaqla, nüvə proqramı üzrə aktiv işlərin bərpası olacaq.

Bildirilib ki, İran hazırda təxminən 400 kiloqram - 60%-lik zənginləşdirilmiş uran ehtiyatına malikdir. Nüvə silahının istehsalı üçün isə təxminən 90% lazımdır.

Amerika və İsrail rəsmiləri anbarların hazırda “təcrid olunduğunu” deyirlər. Hər iki ölkənin kəşfiyyat qurumları obyektlərə ciddi ziyan dəydiyini, lakin bütün maddi və ya infrastrukturun məhv edilmədiyini qiymətləndirir. Onlar uranın çıxarılmasının və ya zənginləşdirmə obyektlərinin yenidən işə salınmasının qarşısını almaq üçün nüvə obyektləri ətrafında İranın fəaliyyətini izləməyə davam edir.

ABŞ və İsrail kəşfiyyatına əsasən, əgər Tehran bu ehtiyatları hərəkətə gətirərsə və ya nüvə obyektlərini yenidən işə salmağa cəhd göstərərsə, Təl-Əviv konkret hərbi addımlar ata bilər.

İsrailin bu planı yaxın günlərdə ABŞ-ın sabiq prezidenti Donald Trampla müzakirə olunacaq. Trampın Baş nazir Benyamin Netanyahu ilə Ağ Evdə keçirəcəyi rəsmi görüşdə İranla bağlı mümkün hərbi ssenarilər də əsas gündəm mövzularından biri olacaq.

Akqabay