“İzzəddin əl-Qəssam” pusqu qurdu: İsrailin 5 əsgəri öldü

İsrail ordusu Qəzzanın şimalındakı Beyt Hanunda 5 əsgərin öldüyünü, 14 əsgərin yaralandığını açıqlayıb.

Publika.az xəbər verir ki, HƏMAS-ın hərbi qanadı “İzzəddin əl-Qəssam” Briqadaları, Beyt Hanunda İsrail əsgərlərinə qarşı qurulan pusqu ilə bağlı Telegram hesabında paylaşım edib.

İsrailin Fələstin xalqına qarşı hücumları və müharibəsi davam etdikcə, əsgərlərin tabutlarının gəlməyə davam edəcəyi qeyd edilən yazıda "Ordunuzun reputasiyasını məhv edəcəyik" deyilir.

İsrail Ordusu Radiosu Beyt Hanunda irəliləyən piyada əsgərlərin yola qoyulan iki bombanın hədəfinə çevrildiyini bildirib. Hücum zamanı yaralanan əsgərlərin təxliyəsi üçün daha bir bölmənin göndərildiyi, lakin onların da atəşə tutulduğu və ölənlərin sayının artdığı üçün mürəkkəb təxliyə üçün əlavə qüvvələrin göndərildiyi bildirilib.

Ölənlərin Netzach Yehuda Batalyonunun əsgərləri olduğu bildirilir. Bu batalyon 1999-cu ildə İsrailin ultra-pravoslav (Haredi) yəhudilərini orduya inteqrasiya etmək üçün yaradılıb. Hazırda təxminən 1000 əsgəri olan batalyon əsasən işğal altındakı İordan çayının qərb sahilində və 2024-cü ildən Qəzzada xidmət edir.

Tural