35 ildən sonra Bağdadda İLK YAŞANDI

Yunanıstanın "Aegean" Hava Yollarına məxsus təyyarə 35 il ərzində Bağdad beynəlxalq hava limanına eniş edən ilk Avropa təyyarəsi olub.

Publika.az AFP-yə istinadla xəbər verir ki, bu barədə İraq Nəqliyyat Nazirliyi məlumat yayıb.

Nazirlik açıqlamasında təyyarənin gəlişinin "İraqın Avropa aviasiya xəritəsinə qayıtması" və "İraqın aviasiya sektorunun bərpasında yeni bir mərhələ" olduğunu bildirib.

Nazirlikdən bildirilib ki, Afina-Bağdad marşrutu həftədə iki dəfə işləyəcək və tələbatdan asılı olaraq uçuşların sayının artırılması mümkündür. Bu ilin əvvəlində Yunanıstan aviaşirkəti şimal Kürdüstan muxtar bölgəsinin paytaxtı Ərbilə uçuşlar həyata keçirməyə başlayıb.

Avropa aviaşirkətləri 1990-cı illərin əvvəllərində İraqın uzun müddətli hökmdarı Səddam Hüseynin qonşu Küveyti işğal eetməsindən bəri təhlükəsizlik səbəbləri ilə Bağdad Beynəlxalq Hava Limanına birbaşa uçuşlar həyata keçirməyib. Hüseyn 2003-cü ildə ABŞ-ın rəhbərlik etdiyi işğal nəticəsində devrilib, ardınca vətəndaş müharibəsi, məzhəblərarası zorakılıq və silahlı ekstremist qrupların ortaya çıxması baş verib.

Hüseyn İbadlı