“İranı dərhal tərk edin” çağırışı - Plan hazırdır, ordu hücum əmrini gözləyir

ABŞ-ın virtual olaraq fəaliyyət göstərən Tehran səfirliyi İrandakı amerikalılara ölkəni tərk etmək haqda çağırış edib.

Publika.az xəbər verir ki, səfirliyin məlumatında “İranı dərhal tərk edin” qeyd olunur.

Bildirilir ki, İrandakı ABŞ vətəndaşları Vaşinqtonun köməyini gözləmədən, ölkədən çıxmalıdırlar. Səbəb kimi davam edən etirazlar və təhlükəsizlik riskləri göstərilir.

“İranı dərhal tərk edin. Tərk edə bilmirsinizsə, evinizdə və ya təhlükəsiz olan digər binalarda qalın”, - səfirliyin məlumatında vurğulanır.

Bu çağırış ABŞ-ın İrana hərbi müdaxilə ssenarisinə əl atacağı gözləntilərini daha da aktualaşdırıb. ABŞ prezidenti Donald Tramp son açıqlamasında bildirib ki, İran danışıqlar aparmaq istəyir: “Lakin biz danışıqlardan öncə hərəkətə keçə bilərik”.

ABŞ Müdafiə Nazirliyinin iki yüksək çinli rəsmisi “CBS News”a bildirib ki, İrana qarşı hərbi müdaxilə və digər addımlarla bağlı detallar Trampa təqdim edilib. Mümkün hərbi müdaxilədə əsas rolu hərbi hava qüvvələri və uzaqmənzilli raketlər oynayacaq, bununla yanaşı, kiberhücumlar və psixoloji fəaliyyətlər də seçimlər arasındadır.

Adının açıqlanmasını istəməyən rəsmilər qeyd edib ki, mümkün əməliyyatlar İranın hərbi rəhbərliyini, kommunikasiya sistemlərini və dövlətin nəzarətindəki medianı hədəfə alacaq. Lakin bununla bağlı ABŞ-da son qərarın verilmədiyi bildirilir.

ABŞ-ın hücuma hazırlığı haqda yayılan məlumatlar fonunda Fransanın da öz vətəndaşlarına “İranı dərhal tərk edin” çağırışı etməsi, o cümlədən, İsrail ordusunun 1 nömrəli hazırlıq vəziyyətinə gətirilməsi hərbi müdaxilənin tezliklə baş verəcəyi gözləntilərini artır.

Asif