Rusiya qoşunlarını Qamışlıdan çıxarır - Gözlənilməz addım

Rusiya Suriyanın şimal-şərqindəki Qamışlı aerodromundan qoşunlarını çıxarmağa başlayıb və bununla da Dəməşq hökumətinin kürd qüvvələrindən nəzarəti ələ keçirməyə çalışdığı bölgədəki hərbi mövcudluğuna son qoyub.

Publika.az xəbər verir ki, bu barədə “Reuters” agentliyi beş Suriya mənbəsinə istinadən məlumat yayıb.

Agentliyin qeyd etdiyi kimi, bu ay Suriyanın keçid prezidenti Əhməd əl-Şaraanın komandanlığı altında hökumət qüvvələri Suriyanın şimalını və şərqini kürd terrorçulardan geri alıb. Beləliklə, Dəməşq bütün ölkə üzərində hakimiyyətini bərqərar etməyə çalışır.

İki mənbəyə görə, Rusiya qoşunları ötən həftə bazalarından tədricən geri çəkilməyə başlayıb. Bəzi qoşunların Suriyanın qərbindəki Rusiyanın Hmeymim aviabazasına köçürülməsi, digərlərinin isə Rusiyaya qayıtması planlaşdırılır.

Qərb sahilindəki digər bir Suriya təhlükəsizlik mənbəyi son iki gündə Rusiya hərbi texnikasının və ağır silahlarının Qamışlıdan Hmeymim hərbi aerodromuna daşındığını vurğulayıb. Bazar ertəsi günü isə “Reuters” jurnalisti Qamışlı hava limanında Rusiya bayraqları görüb. Burada uçuş-enmə zolağında Rusiya nişanları olan iki təyyarə park edilib.

Daha əvvəl Əl-Şaraanın Rusiya lideri Vladimir Putinlə görüşmək üçün Moskvaya səfər edəcəyi açıqlanmışdı. Səfər yanvarın 28-nə planlaşdırılır.

Tural