Yaxın Şərqdə “dost atəşi”: ABŞ qırıcıları belə vurulub

Küveytdə ABŞ qırıcıları ilə bağlı faciəvi insident yaşandığı barədə məlumat vermişdik. Bu ölkədə ABŞ-ın 3 qırıcısı vurulub. Hadisənin təfərrüatı bəlli olub.

Publika.az xəbər verir ki, “The Wall Street Journal” nəşrinin mənbələrə istinadən yaydığı məlumata görə, martın 1-də Küveytə məxsus F/A-18 təyyarəsinin pilotu səhvən üç ABŞ F-15 qırıcısını vurub.

Hadisələrin gedişinə görə, insidentdən əvvəl İran istehsalı olan pilotsuz uçuş aparatı Küveytin hava hücumundan müdafiə sistemini yararaq limandakı əməliyyat mərkəzinə zərbə endirib. Nəticədə altı amerikalı hərbçi həlak olub. Bu hücum Küveyt silahlı qüvvələri arasında ciddi gərginlik yaradıb və hərbçilər mümkün yeni təhlükələrə qarşı yüksək hazırlıq vəziyyətinə gətirilib.

Məlumata əsasən, radar ekranlarında ABŞ-a məxsus təyyarələr göründükdə, Küveyt hərbçiləri artıq son dərəcə gərgin psixoloji vəziyyətdə olub. Yerli pilot hava hədəflərini potensial düşmən kimi qiymətləndirərək atəş açıb. Nəticədə üç F-15 qırıcısı vurulub.

Pentaqon insidentlə bağlı məlumatı hələlik rəsmi şəkildə şərh etməyib. Bununla belə, mənbələr hadisə ilə bağlı araşdırmanın başladığını və ilkin hesabatların “dost atəşi” versiyasını göstərdiyini bildirir.

Adəm