İranla müharibə dünya iqtisadiyyatını sarsıdacaq - 3 dəhşətli ssenari

İrandakı müharibənin inkişafına dair üç mümkün ssenari təqdim edilib.

Publika.az xəbər verir ki, bu ssenarini Serbiyanın “Novi Standart” nəşri paylaşıb.

Müəllif qeyd edir ki, bu variantların hər biri dünya üçün qaçılmaz sarsıntılar vəd edir.

Birinci ssenari təxminən iki həftə davam edəcək “qısa və amansız münaqişə”ni nəzərdə tutur. Bu halda dünya illik neft və maye qaz (LNG) ixracının təxminən 1,4%-ni itirəcək.

İkinci ssenari üç ay müddətinə uzanan hərbi əməliyyatları ehtiva edir. Bu ssenarinin nəticələri daha ağır olacaq: “İtki dünya neft və LNG ixracının beş-altı faizinə çatacaq”.

Üçüncü ssenari də üç aylıq müharibəni nəzərdə tutur, lakin burada İranın Hark adasındakı kritik infrastruktur obyektlərinin uzunmüddətli dağıdılması əsas şərtdir. Belə bir zərbənin fəsadları hətta 2027-ci ildə də hiss olunacaq.

Materialın müəllifi vurğulayır ki, bu vəziyyətdə neftin qiyməti barel başına 150 dollara, Avropa İttifaqında qazın qiyməti isə 120 avroya çata bilər.

Vəziyyəti daha da mürəkkəbləşdirən amil Tehrann 5000 minadan ibarət arsenalı ilə boğazı minalamağa başlamasıdır.

Məqalədə qeyd olunur: “İran artıq Hörmüz boğazında minalar yerləşdirməyə başlayıb ki, bu da cəmi bir neçə gün ərzində bu ən mühüm gəmiçilik kanalını cəhənnəmə çevirə bilər”.

Müəllif yekun olaraq bildirir ki, əgər Hörmüz boğazı üç aydan çox bağlı qalsa, bu, 1973-cü il “Qiyamət günü” müharibəsi və ya 1979-cu il İran inqilabının nəticələrindən daha ciddi bir sarsıntıya çevrilə bilər.

Adəm