İranda ABŞ qırıcısı Rusiya silahı ilə vurulub? - Sensasion iddia

ABŞ-ın F-15E qırıcısının İranın hava məkanında vurulması ilə bağlı əlavə təfərrüatlar üzə çıxıb.

Publika.az xəbər verir ki, hadisənin təfərrüatları barədə hərbi ekspert, istefada olan polkovnik Viktor Litovkin TASS-a verdiyi açıqlamada maraqlı faktları bölüşüb.

Ekspertin sözlərinə görə, qırıcının vurulmasında Sovet və ya Rusiya istehsalı olan hava hücumundan müdafiə (HHM) sistemlərinin iştirakı ehtimalı yüksəkdir. Litovkin bildirib ki, zərbə İranın arsenalında olan "Tor-M1" zenit-raket kompleksi ilə endirilə bilərdi. Bu kompleksin mobilliyi və bir neçə on kilometr məsafədə hədəfləri məhv etmə qabiliyyəti onu belə əməliyyatlar üçün effektiv edir.

Bundan əlavə, ekspert daha böyük məsafədən hədəf seçə bilən S-300 sistemlərinin, həmçinin aşağı hündürlükdə uçan hədəflər üçün "İqla" və "Verba" kimi daşınan zenit komplekslərinin də tətbiq olunmuş ola biləcəyini istisna etməyib.

Qeyd edək ki, aprelin 3-də məhv edilən qırıcının hər iki heyət üzvü katapult edə bilib. "Axios" portalının məlumatına görə, pilotlar hadisədən bir neçə saat sonra ərazidən təxliyə olunublar. Lakin xilasetmə əməliyyatı ABŞ və İsrail üçün ağır nəticələnib.

"Military Watch Magazine"in aprelin 5-də yaydığı məlumata görə, xilasetmə əməliyyatı zamanı tərəflər ümumilikdə 11 uçuş aparatını itiriblər.

Müəllif: Adəm