"Qafqaz mafiyası"nın rəhbərini onlar öldürüblər - İsrail xüsusi təyinatlılarından əməliyyat

İsrail polisinin xüsusi təyinatlı bölməsinin əməkdaşları İsrailin şimalındakı Hadera şəhərində Or-Akiva şəhərindən olan iş adamı Yanis Yuşvaevin qətlində şübhəli bilinən bir neçə şəxsi saxlayıblar.

Publika.az xəbər verir ki, bu barədə “Israel National News” məlumat yayıb.

Qeyd olunub ki, Hadera şəhərində saxlanılma əməliyyatını “Yamam” xüsusi təyinatlı bölməsinin əməkdaşları keçiriblər.

Polisdən bildirilib ki, saxlanılanlar dindirilmək və növbəti istintaq tədbirlərinin aparılması üçün polis bölməsinə gətiriliblər.

Bundan əvvəl İsraildə “Qafqaz mafiyası”nın başçısı Yanis Yuşvaevin Keysariya şəhərindəki kafenin yaxınlığında güllələndiyi bildirilirdi. Qatil dəstə rəhbərinə demək olar ki, yaxın məsafədən atəş açıb, bundan sonra qaçıb. Yuşvaevi ən nüfuzlu və təhlükəli cinayətkarlardan biri adlandırırdılar, lakin çoxsaylı saxlanılmalara baxmayaraq, ona qarşı heç vaxt rəsmi ittiham irəli sürülməmişdi.

Müşahidə kamerasının dərc olunmuş görüntülərində qatilin restoranın qapısı ağzında, Yuşvaev də daxil olmaqla, üç kişinin çölə çıxdığı məqamda dayandığı görünür. İnsanlara yol verdiyini nümayiş etdirən qatil “Qafqaz mafiyası” başçısının onun yanından keçməsini gözləyib, bundan sonra tapançanı çıxararaq demək olar ki, yaxın məsafədən onun ənsəsindən atəş açıb.

Hüseyn İbadlı