İran ABŞ kəşfiyyat obyektlərinə milyardlarla dollar ziyan vurub

İranın raket və pilotsuz uçuş aparatları ilə həyata keçirdiyi hücumlar Yaxın Şərqdə ABŞ kəşfiyyat obyektlərinə görünməmiş miqyasda ziyan vurub. Bu zərərin miqyası ABŞ xüsusi xidmət orqanlarının bütün fəaliyyəti ərzində üzləşdiyi istənilən dağıntını geridə qoyur.

Publika.az xəbər verir ki, bu barədə dörd mənbəyə istinadən “NBC News” telekanalı məlumat yayıb.

Bu hücumlar nəticəsində Amerika xüsusi xidmət orqanlarının obyektlərinə və müşahidə avadanlıqlarına ziyan dəyib, onların bərpası üçün milyardlarla dollar tələb olunacaq.

Telekanal qeyd edib ki, dron və raket zərbələri müasir pilotsuz müharibə taktikasına vaxtında uyğunlaşmayan ABŞ-ın hərbi bazalarının və diplomatik missiyalarının müdafiəsində ciddi boşluqları üzə çıxarıb.

“NBC News”un məlumatına görə, İran Çin və Rusiyadan kəşfiyyat məlumatları və peyk şəkilləri alıb ki, bu da zərbələrin dəqiqliyini artırıb.

Bundan əvvəl “Financial Times” qəzeti İran tərəfindən zərər vurulmuş Fars körfəzindəki Amerika hərbi bazalarının bir hissəsinin bərpasının məqsədəuyğun olmaması barədə yazmışdı.

Hüseyn İbadlı