Suriyada qüvvələr nisbəti dəyişir - SDQ buraxılır

Suriyada ABŞ-ın əsas müttəfiqlərindən olan kürdlərin rəhbərlik etdiyi Suriya Demokratik Qüvvələrinin (SDQ) buraxılması elan edilib.

Publika.az xəbər verir ki, SDQ-nin komandiri birliyin fəaliyyətinə son qoyulacağını açıqlayıb. 2015-ci ildə yaradılan SDQ ABŞ-ın dəstəyi ilə “İslam Dövləti” terror təşkilatına qarşı quruda aparılan döyüşlərdə əsas qüvvələrdən biri olub.

SDQ faktiki olaraq Suriyanın şimal-şərqindəki kürd muxtar administrasiyasının ordusu rolunu oynayıb. Uzun illər ərzində onun nəzarətində geniş ərazilər və mühüm infrastruktur obyektləri olub.

Qüvvələrin buraxılması Suriyada hərbi-siyasi vəziyyətə ciddi təsir göstərə bilər. Əsas suallardan biri isə SDQ döyüşçülərinin və indiyədək nəzarətdə saxladıqları ərazilərin gələcək taleyidir.

Məlumata görə, SDQ-nin Suriya ordusunun tərkibinə daxil olması nəzərdə tutulur. Lakin xarici KİV komandirin orduya qoşulma ilə bağlı açıqlamasının vaxtından əvvəl verildiyini yazıb.

Bildirilir ki, inteqrasiya mərhələli şəkildə həyata keçiriləcək. Hələlik SDQ-nin bütün döyüşçülərinin Suriya Silahlı Qüvvələrinə qoşulub-qoşulmayacağı, yoxsa onların bir qisminin orduda başqa vəzifələrə keçiriləcəyi məlum deyil.

Müəllif: Adəm