İran iqtisadiyyatı kritik həddə çatır: Tehran ABŞ-la niyə razılaşmır?

İran iqtisadiyyatında vəziyyət kritik həddə yaxınlaşır. Tehran ABŞ-la danışıqlarda təkcə gəmiçilik dəhlizini deyil, ölkənin gələcəyini və mövcudluğunu müəyyənləşdirəcək şərtləri müzakirə edir.

Publika.az xəbər verir ki, bu barədə “VESTİ”yə ekspert Oleq Xanin danışıb.

Onun sözlərinə görə, Tehran ABŞ-la danışıqların nəticəsinin İranın gələcəyi üçün həyati əhəmiyyət daşıdığını anlayır. Buna baxmayaraq, iranlılar Vaşinqtonun şərtləri ilə razılaşmağa hazır deyillər.

“Hazırda İran təkcə gəmiçilik dəhlizi uğrunda deyil, özünün yeni sağqalma rejimi, kimliyi və ölkənin gələcəyi uğrunda bazarlıq edir. Çünki İran iqtisadiyyatı tükənib”, - deyə ekspert bildirib.

Xanin qeyd edib ki, vəziyyət hələ tam kritik həddə çatmasa da, İran artıq bu sərhədə yaxınlaşıb.

Ekspertin fikrincə, Tehran danışıqlarda hər sent uğrunda mübarizə aparır və mümkün qədər əlverişli şərtlər əldə etməyə çalışır. Onun sözlərinə görə, tərəflər hələ elə böhranlı mərhələyə çatmayıblar ki, İran istənilən şərtlə razılaşmağa məcbur olsun.

Bu isə o deməkdir ki, yaxın müddətdə Hörmüz boğazı əvvəlki gücü ilə fəaliyyətini bərpa etməyə bilər. Xanin hesab edir ki, bunun nəticəsində dünya üzrə bir sıra məhsulların qiyməti bahalaşa bilər.

Müəllif: Adəm