ABŞ Hörmüz boğazında mühüm addım atdı

ABŞ hərbçiləri Hörmüz boğazındakı beynəlxalq gəmiçilik marşrutlarını İran tərəfindən yerləşdirildiyi bildirilən dəniz minalarından təmizləyib.

Publika.az xəbər verir ki, bu barədə ABŞ Mərkəzi Komandanlığının rəhbəri admiral Bred Kuper açıqlama verib. Onun sözlərinə görə, əməliyyatda ABŞ Hərbi Dəniz Qüvvələrinin dalğıcları, “Navy SEALs” xüsusi təyinatlıları və müxtəlif hərbi aviasiya qüvvələri iştirak edib. Kuper əməliyyatın “mürəkkəb və təhlükəli” olduğunu, lakin tapşırığın uğurla yerinə yetirildiyini bildirib.

Məlumata görə, son aylarda ABŞ qüvvələri Hörmüz boğazından təxminən 1,5 min kommersiya gəmisinin keçidini təmin edib. Bu gəmilərin ümumilikdə 750 milyon barelə yaxın neft daşıdığı qeyd olunur.

Hazırda bölgədə 50 minə yaxın ABŞ hərbçisinin yerləşdirildiyi bildirilir. Əməliyyatda 20-dən çox hərbi gəmi və yüzlərlə təyyarə iştirak edir.

ABŞ daha əvvəl İrana xəbərdarlıq edib ki, boğazda yeni minaların yerləşdirilməsi halında belə addımı atan gəmilər məhv ediləcək. Hörmüz boğazı dünya neft tədarükünün əsas marşrutlarından biri olduğundan, onun bağlanması qlobal enerji bazarında ciddi böhrana səbəb ola bilər.

Müəllif: Adəm