Əzizi ABŞ-ı hədələdi: Qisas yaxınlaşır, qaçın!

İran parlamentinin Milli Təhlükəsizlik Komitəsinin rəhbəri İbrahim Əzizi Yaxın Şərqdə yeni eskalasiyaya görə ABŞ-ın “daha ağır bədəl” ödəyəcəyini bildirib və amerikalılara “sadəcə qaçmağı” məsləhət görüb.

Publika.az xəbər verir ki, Əzizi sosial şəbəkə hesabında qisasın yaxınlaşdığını yazıb.

Onun sözlərinə görə, gərginliyin daha da artacağı təqdirdə İran cavab addımları atmağa hazırdır.

Bu açıqlama ABŞ-ın İranın Larak adasındakı raket qurğularına zərbə endirməsindən sonra səsləndirilib. “Axios”un müxbiri Barak Ravid ABŞ-ın adadakı iki qurğunu vurduğunu bildirib. Mənbənin məlumatına görə, İran həmin qurğulardan Hörmüz boğazına dəniz minaları daşıyan raketlər buraxmaq üçün istifadə etməyi planlaşdırırdı.

Buna cavab olaraq İran ABŞ-ın İordaniyadakı bazalarına zərbələr endirib. Hədəflərin məruz qaldığı ziyan və mümkün itkilərlə bağlı məlumat açıqlanmayıb.

Vaşinqtonla Tehran arasında gərginlik Fars körfəzindəki münaqişə fonunda artmaqda davam edir. ABŞ İrana qarşı iqtisadi təzyiqləri gücləndirir, Tehran isə cavab addımlarına hazır olduğunu bəyan edir.

Müəllif: Adəm