Bağlı qapılar arxasında yeni sima - İrəvandan geri dönən Lion İsrail-Türkiyə xəttində

İsrail Türkiyədəki diplomatik missiyasına yeni rəhbər təyin edib, lakin ölkənin Ankaradakı səfirliyi təhlükəsizlik təhdidlərinin qalması səbəbindən faktiki olaraq fəaliyyət göstərməməyə davam edir.

Publik.az xəbər verir ki, bu barədə “Middle East Eye” nəşri israilli məmura istinadla məlumat yayıb.

İsrailin Türkiyədəki yeni müvəqqəti işlər vəkili Yoel Lion olub. Çərşənbə günü o, Ankarada etimadnaməsini Türkiyənin xarici siyasət idarəsinə təqdim edib. Bu, İsrailin 2023-cü ilin sonunda Ankara və İstanbuldan diplomatik nümayəndəliklərin əməkdaşlarını geri çağırdıqdan sonra yüksək rütbəli israilli diplomatin Türkiyəyə ilk səfəridir.

Lion əvvəllər İsrailin Moldovadakı ilk daimi səfiri olub və bu vəzifəni 2025-ci ilin aprelinə qədər tutub. Bundan əlavə, 2026-cı ilin avqust ayına qədər o, uyğunluq qaydasında İsraili həm də Ermənistanda səfir kimi təmsil edib.

Təyinat İsrailin Türkiyədəki səfiri İrit Lilyanın istefasından sonra baş tutub. Onun getməsindən sonra səfir postu boş qalmışdı.

İsrailli məmurun sözlərinə görə, səfirliyin tammiqyaslı fəaliyyətinin olmaması siyasi qətiyyətlə deyil, birmənalı olaraq təhlükəsizlik məsələləri ilə bağlıdır. Eyni zamanda, diplomatik nümayəndəlik rəsmi olaraq bağlanmayıb; yerli işçilər ölkədə işləməyə davam edirlər. “Hər iki tərəf razıdır ki, səfirlik təhlükəsizlik məsələlərinə görə bağlı qalmalıdır”, - deyə o bildirib.

İsrail və Türkiyə arasında münasibətlər 2022–2023-cü illərdə nəzərəçarpacaq dərəcədə yaxşılaşmağa başlamışdı, lakin 2023-cü il oktyabrın 7-də HƏMAS İsrailə hücum etdikdən və Qəzza sektorunda müharibə başlandıqdan sonra kəskin şəkildə pisləşdi.

Ankara İsrailin hərbi əməliyyatını pisləyən ilk ölkələrdən biri oldu və sonradan İsrailin hərəkətlərini “genosid” kimi qiymətləndirdi. 2024-cü ildə Türkiyə İsrailə qarşı ticarət məhdudiyyətləri tətbiq etdi.

Gərginlik Suriyadakı təhlükəsizlik məsələlərinə də təsir göstərib. Son vaxtlar iki ölkənin münasibətləri Suriyanın şimalında — Türkiyə sərhədindən təqribən 70 kilometr məsafədə yerləşən Əbu-əl-Duhur hərbi aviabazasına endirilən İsrail zərbələri səbəbindən mürəkkəbləşib.

İsrail bəyan edib ki, zərbələri Türkiyənin bazada hava hücumundan müdafiə sistemləri yerləşdirməyə hazırlaşması səbəbindən endirib. İsrailin iddiasına görə, onların yerləşdirilməsi İsrail aviasiyasının həmin rayonda əməliyyatlar aparmaq imkanlarını məhdudlaşdıra bilərdi.

Hüseyn İbadlı