Şaxta baba metroda hədiyyə paylayacaq

Bakı Metropoliteninin 50 illik yubiley tədbirlərində olduğu kimi, retro vaqonlar bu dəfə də xəttə buraxılacaq.

“Bakı Metropoliteni”nin mətbuat xidmətindən Publika.az-a verilən məlumata görə, Yeni il rəmzləri ilə bəzədilmiş “A” və “Q” tipli 2 retro vaqonun qoşulduğu iki qatar dekabrın 29-dan 2019-cu il yanvarın 2-dək günün müəyyən saatlarında xüsusi qrafiklə xəttə buraxılacaq.

“Sərnişinlərimizin orta və yaşlı nəslinin nümayəndələri hər dəfə bu vaqonları xətdə görəndə nostalji hisslər keçirirlər. Zövqlə bəzədilərək bayram ovqatına köklənmiş retro vaqonlara uşaqlar da biganə qalmayır”.

Məlumatda bilıdirilir ki, Yeni il bayramının əsas qəhrəmanları Şaxta baba və Qar qız yenə də kiçik yaşlı sərnişinlərin görüşünə gələcək. Üç gün - dekabr ayının 29-dan 31-nə qədər metronun retro vaqonların qoşulduğu qatarlarında Yeni ilin əsas personajları azyaşlı sərnişinlərə hədiyyələr paylayacaqlar.

Son illərdə formalaşmış ənənəyə uyğun olaraq, bu il də Metropolitenin şəhərin mərkəzində yerləşən və sərnişin axınının sıx olduğu stansiyalarında konsert proqramı təşkil ediləcək. Dekabrın 30-dan yanvarın 2-dək milli muğam üçlüyü və instrumental kvartetin ifa etdiyi canlı musiqi “İçərişəhər”, “Sahil”, “28 May”, ”Elmlər Akademiyası” stansiyalarının sərnişinlərində əsl bayram ovqatı yaradacaq.