Oqtay Gülalıyev: “KXCP-də mənim kimi düşünənlərin sayı çoxdur”

“Mənim partiya rəhbərliyi ilə bir çox məsələdə fikir ayrılığım var və buna görə də tutduğum vəzifədən azad olundum. Lakin KXCP-də mənimlə bağlı baş verənlər kiçik məsələdir. Bunu böyütməyə dəyməz”.

Publika.az xəbər verir ki, bu barədə KXCP sədrinin müavinlik postundan uzaqlaşdırılan Oqtay Gülalıyev deyib.

O, Elçibəy yolunun davamçısı olduğunu bildirib: “Partiyanın hazırkı siyasi kursu, yürüdülən siyasi fəaliyyət, xüsusən təşkilatımızın Milli Şuradan kənarda qalması, dialoqda iştirak etməsi və s. məsələlərlə bağlı fikir ayrılığımız var. AXC-nin varisi olan partiyamızın mübarizənin önündə olmasının tərəfdarıyam. Mən KXCP-yə vəzifə üçün gəlməmişəm. Vəzifələr gəldi-gedərdi. Amma hədəflər və prinsiplər qalıcıdır”.

O. Gülalıyev vəzifədən uzaqlaşdırılsa da, partiya rəhbərliyi və üzvləri ilə normal münasibətlər saxladığını qeyd edib.

“Heç kimlə problemim yoxdur. Problemlərə fərqli baxışlarımız bu münasibətlərə xələl gətirmir. Mən KXCP-nin sıravi üzvü olaraq partiyada fəaliyyətimi davam etdirəcəm. Bilirəm ki, partiyada mənim kimi düşünən xeyli sayda fədakar və mübariz insanlar var”, - deyə o bildirib.

Asif