Bu torpaqlar əsl sahiblərindədir - Rəy

"Azərbaycan 44 günlük Vətən müharibəsində qalib gələrək Kəlbəcər, Laçın, Ağdam rayonlarını bir güllə atmadan işğaldan azad etdi. Müharibənin bitməsi, adıçəkilən rayonların döyüşsüz azad olunması itkilərimizin çoxalmamasına gətirib çıxardı".

Bunu Publika.az-a sabiq xarici işlər naziri, politoloq Tofiq Zülfüqarov deyib.

Politoloq qeyd edib ki, Azərbaycan torpaqlarını azad edərkən itkilərin minimum olması üçün xüsusi çalışıb:

"Müharibə qanunlarına nəzər yetirdikdə görürük ki, hücum edən tərəf müdafiə olunandan daha çox itki verir. Ancaq İkinci Qarabağ müharibəsində ermənilərin itkisi bizdən qat-qat çox idi. Laçın rayonunun işğaldan azad olunması həm də siyasi qələbədir. Hətta müharibə bitdikdən sonra Türkiyə Prezidenti Rəcəb Tayyib Ərdoğan İlham Əliyevi siyasi və hərbi qələbə münasibətilə təbrik etdi. Qarabağ ərazisinin demək olar ki, böyük bir hissəsi bir güllə atmadan və itki vermədən işğaldan azad olunub. İndi isə bütün o torpaqlar əsl sahiblərindədir. Laçın Azərbaycanın dilbər guşələrindən biridir və oranın çox füsunkar təbiəti var. Həyatımda bir dəfə Laçında olmuşam və orada insanların necə gözəl yaşadığını və ətraf mühitin gözəlliyini müşahidə etmişəm. Artıq bütün Qarabağ ərazisində bərpa işləri gedir. Yenidənqurma işləri bitdikdən sonra vətəndaşlarımız doğma torpaqlarına qayıdacaqlar. Heç şübhəsiz ki, Laçın şəhəri gələcəkdə turistləri cəlb edən yerlərdən biri olacaq".