Pənah Hüseyn: “Hələ meriyadan cavab alaq...“

Bu barədə Publika.Az-a açıqlamasında İP Koordinasiya Şurasının üzvü Pənah Hüseyn bildirib.

Onun sözlərinə görə, mitinqin keçirləcəyi yerlər və şüarlar barədə qərar qəbul olunduqdan sonra Bakı Şəhər İcra Hakimiyyətinə məktub göndəriləcək: “Meriyadan cavab aldıqdan sonra, aksiyanın razılaşdırılmış və ya razılaşdırılmamış şəkildə harda keçiriləcəyi barədə müzakirə aparacağıq”.

O, aksiyaların məqsədi barədə sualı da şərh edərək bildirib ki, aksiya konkret şüarlar və tələblərlə keçiriləcək: “Aksiyalar vətəndaşların hüququdur və bu aksiyada müəyyən ictimai-siyasi vəziyyətə, hadisələrə münasibət bildiriləcək. Burada sosial tələblər, ədalətli seçkilər, toplaşma və özünüifadə azadlığı, köklü siyasi islahatlara və demokratikləşməyə çağırışlar yer alacaq”.

P.Hüseyn qeyd edib ki, “hakimiyyəti dəyişmək” fikrini bir aksiyaya bağlamaq doğru deyil: “Bizim apardığımız demokratikləşmə kursu var və strateji kursumuzun tərkib hissəsi kimi bu aksiya da ona xidmət edir”.

Hakimiyyətlə dialoq məsələsinə də münasibət bildirən P.Hüseyn bildirib ki, dialoq siyasi münasibətlərin sivil formasıdır: “Mən hesab edirəm ki, əvvəl-axır Azərbaycan iqtidarı ölkənin demokratik müxalifəti ilə bir masa arxasına oturub islahatlar istiqamətində müəyyən işbirliyi quracaq”.

Rüfət Əhmədzadə
Publika.Az