Florent Parmentier: “Tehran və Moskvanın ortaq hədəfi İrəvana dəstək, Bakıya...”

“Qərb İranla nüvə razılığını gündəmə gətirən kimi Moskva-Tehran dialoqu yenidən başladı. Elmi ateizmin hökm sürdüyü ölkə ilə teokratiya ölkəsinin bir arada olması paradoks təşkil edir. Lakin onların ortaq siyasi cəhətləri çoxdur”.

Publika.az xəbər verir ki, bu barədə Paris siyasi tədqiqatlar institutunun eksperti, “Eurasia Prospective” bloqunun müəllifi Florent Parmentier Fransanın “Atlantico” nəşrinə açıqlamasında deyib.

Onu sözlərinə görə, İranla Rusiyanın Orta Asiya və Cənubi Qafqazda oxşar hədəfləri var: “Misal üçün, hər iki ölkə Cənubi Qafqazda Ermənistanı daha çox dəstəkləyir, nəinki Azərbaycanı. Bu oxşar cəhətlərdən çıxış edən Rusiya İranın Qərblə anlaşma ərəfəsində olduğu bir vaxt onunla münasibətləri bərkitməyə çalışır. Suriya rejiminə dəstək və Yəməndə baş verənlərlə bağlı Moskva Tehranın mövqeyindən çıxış edir. Bu gün Rusiya İrana “S-300” raketlərinin satılması haqda danışıqları yeniləyir. Rusiyaya İranın tamamilə Qərbə yol alıb ondan üz çevirməməsi lazımdır. İrana isə bu silahlar müdafiə və nüvə proqramlarının təhlükəsizliyi üçün vacibdir. Lakin bu, İsrailin qəzəbinə tuş gəlir. Çünki Təl-Əviv İranın ona qarşı hücum etmək niyyətində olduğunu iddia edir. Tehran da indiyə qədər hədələri ilə belə deməyə əsas verib”.

F. Parmentier qeyd edib ki, İran “S-300”ləri əldə etməklə regionda öz zəhmini də artırmaq istəyir: “Bu ölkə regional güc olmaqda israrlıdır. Misal üçün, Cənubi Qafqazda Rusiya ilə ortaq hədəfləri olsa da, Tehran bu regionda ağalığı əldə etməyi həmişə arzulayıb. İndi öz arsenalını gücləndirməklə onlar regional güc olmaq hədəflərinə doğru addımlamaq istəyirlər”.

Asif Nərimanlı