Sahibə Qafarova ilə Simonyan Türkiyədə nələri müzakirə ediblər?

Aprelin 17-də İstanbulda Parlamentlərarası İttifaqın 152-ci Assambleyası çərçivəsində Azərbaycan və Ermənistan parlamentlərinin sədrləri Sahibə Qafarova və Alen Simonyan arasında ikitərəfli görüş keçirilib.

Publika.az xəbər verir ki, Ermənistan Milli Assambleyanın mətbuat xidmətindən verilən məlumata görə, görüş zamanı tərəflər iki ölkə arasında münasibətlərin normallaşmasındakı son inkişafları, o cümlədən sülh və sabitliyin möhkəmləndirilməsinə, eləcə də ticarət əlaqələrinin qurulmasına və genişləndirilməsinə yönəlmiş addımları məmnuniyyətlə qeyd ediblər.

Parlamentlərarası İttifaqın parlamentlərarası əməkdaşlıq üçün mühüm platforma kimi rolu qeyd edilib.

Bu kontekstdə tərəflər Parlamentlərarası İttifaqın baş katibi Martin Çunqonqa Ermənistan və Azərbaycan parlamentlərinin sədrləri arasında dialoqun təşviq edilməsindəki şəxsi səylərini yüksək qiymətləndiriblər və ona minnətdarlıqlarını bildiriblər.

Parlament sədrləri 2025-ci ilin oktyabr ayında Cenevrədə keçirilən görüşdən sonra beynəlxalq təşkilatlar çərçivəsində parlament nümayəndə heyətləri arasında başlayan əlaqələri yüksək qiymətləndiriblər və bu ünsiyyəti davam etdirmək barədə razılığa gəliblər.

Simonyan və Qafarova həmçinin iki cəmiyyət arasında etimadı daha da gücləndirmək üçün konstruktiv parlament dialoqunun davam etdirilməsinin vacibliyini vurğulayıblar.

Müəllif: Tural