Dünya yenidən erməni terrorçularını tanımalıdır - Deputat

“Ermənilərin informasiya müstəvisində etdikləri, ayrı-ayrı televiziya və qəzet mənsubu olan mətbuat işçilərini hədələmələri, onlara qarşı terror təhdidləri irəli sürmələri Ermənistanın mahiyyətindən bir daha xəbər verir”.

Bu fikirləri Publika.az-a açıqlamasında Milli Məclisin deputatı, “Yeni Azərbaycan” qəzetinin baş redaktoru Hikmət Babaoğlu deyib.

Onun sözlərinə görə, Ermənistan necə terrorçu dövlətdirsə, işğalçı orduları necə terrorçudursa, mülki, dinc sakinləri hədəf alırlarsa, elə erməni lobbisi də informasiya müstəvisində bu terrorun davamını həyata keçirir: “Qərbi Avropanın ən nəhəng ölkələrindən biri olan Fransanın TF1 telekanalının müxbirinin ASALA terror təşkilatının üzvü olan bir erməni tərəfindən ölümlə hədələnməsi əslində, bir daha erməni terrorunun bu gün nə dərəcədə aqressiv olduğunu bütün dünyaya nümayiş etdirir. Bütün dünya bir daha aydın dərk edir ki, Azərbaycan əslində kimlərlə, necə bir işğalçı ölkə ilə, terroru mənimsəmiş və xislətində, hərəkətlərində onu hər addım başı nümayiş etdirən terrorçu birləşmə ilə, dövlətlə üzbəüzdür. Eyni zamanda, “New York Times” qəzetində dərc olunan obyektiv yazıya görə erməni lobbisinin ABŞ-da həyata keçirdikləri də eynilə yenə terrorçuluqdur. Ondan bir qədər əvvəl ABŞ-ın ayrı-ayrı ştatlarında yol kəsərək, ictimai qaydaları pozaraq, yerli hakimiyyət orqanlarına təzyiq etməyə çalışan erməni lobbisinin üzvləri də etdikləri hərəkətlə yenə terrorçu olduqlarını nümayiş etdirirlər. Çünki ictimai asayışı pozmaq, güc tətbiq etmək terrorizmdir”.

H.Babaoğlu qeyd edib ki, nəhayət Qərb dərk etməlidir ki, əgər doğrudan da sivil davranış, Avropa dəyərləri, insan hüquqları alidirsə, o zaman mütləq ona qarşı çıxan terrorçular cəzalandırılmalıdır: “İnformasiya müstəvisində terror törədənlər, qonşu ölkələrə qarşı terror həyata keçirənlər mütləq cəzalandırılmalıdırlar. Nəhayət, söz və mətbuat azadlığına qarşı terror hədəsi ilə çıxış edənlər mütləq öz layiq olduqları cəzanı almalıdırlar. Əminəm ki, hazırkı informasiya müharibəsinin kontekstində Azərbaycan erməni terrorizmini dünyaya yenidən tanıdır və dünya yenidən erməni terrorçularını tanımalıdır”.

Akqabay Mıradov