Düşünülməmiş orta əsr təfəkkürlü siyasət Ermənistana zərbə vurur - DEPUTAT

“Düşünülməmiş orta əsr təfəkkürlü siyasət Ermənistanın özünə də zərbələr vurmaqdadır”.

Bunu Publika.az-a açıqlamasında deputat Aydın Mirzəzadə bildirib.

Deputat Avropa Parlamentinin Azərbaycanın ərazi bütövlüyünü dəstəkləyən bəyanatını belə qiymətləndirib:

“Avropa Parlamentinin Ermənistan üzrə məruzəçisi belə Azərbaycanın ərazi bütövlüyünü dəstəkləyən bəyanata qol çəkib. Dünya bu gün Azərbaycanın ərazi bütövlüyünü dəstəkləyir və torpaqlarının bir hissəsinin işğalda olmasının fərqindədir. Buna görə də Azərbaycan dünyada daha çox dəstək qazanır. Heç kəs hesab etməsin ki, beynəlxalq təşkilatların bəyanatı bugünkü dünyada az əhəmiyyət daşıyır. Əksinə, bu gün dünyada ölkələr bir-birinə o qədər sıx bağlıdır ki, onların həm ölkə daxilində cəmiyyətin dəstəyinə, həm də xaricdə dəstəyə çox ehtiyacı var.

Beynəlxalq təşkilatların heç biri Ermənistanın işğalçılıq siyasətini dəstəkləmir. Bir erməni politoloqu qeyd edib ki, bütün gücümüzü ortaya qoyub, 20-dən çox ölkənin parlamentinin “erməni soyqırımı”nı tanımasına nail olduq. Amma bu ölkələrdən heç biri bu gün Ermənistanın Dağlıq Qarabağ məsələsində yürütdüyü siyasəti müdafiə etmir”.

Məhərrəm