Yaxın Şərqdə yeni eskalasiya qorxusu - ABŞ təcili tədbirlər görür

ABŞ Yaxın Şərq ölkələrindəki diplomatik nümayəndəliklərinin əməkdaşlarının bir hissəsinin və onların ailə üzvlərinin təxliyəsini təcili şəkildə təşkil etməyə başlayıb.

Publika.az xəbər verir ki, bu barədə CNN telekanalı mənbələrinə istinadla məlumat yayıb.

Jurnalistlərin məlumatına görə, bu tədbirlərə səbəb ABŞ kəşfiyyatının qeydə aldığı İranın fəallığının artması olub. Kəşfiyyatın məlumatına əsasən, İran tərəfi ehtimal olunan hücumlara hazırlıqda “qabaqcıl mərhələyə çatıb”.

CNN qeyd edib ki, ABŞ diplomatları təxliyənin xaotik təşkil olunmasından və maliyyə dəstəyinin yetərsizliyindən şikayətlənirlər. Onların sözlərinə görə, yaxın vaxtlarda vəzifə yerlərinə qayıtdıqdan sonra yenidən yaşayış yeri axtarmaq məcburiyyətində qalıblar.

Bundan bir neçə saat əvvəl “Reuters” agentliyi İranın ABŞ və İsrailin zərbələri bərpa edəcəyi təqdirdə Fars körfəzindəki sualtı rabitə kabellərinə hücum planı hazırladığını bildirmişdi. Qeyd edilib ki, Tehran yalnız sualtı infrastrukturu sıradan çıxarmaq deyil, həm də onun bərpasına mane olmaq niyyətindədir. Məqsəd rabitə və internetdəki fasilələri uzatmaqdır.

Hüseyn İbadlı