Beynəlxalq Jurnalistlər Şurası jurnalistin hədələnməsinə ETİRAZ ETDİ

İki gün öncə Fransanın TF1 telekanalının əməkdaşı Liseron Budulun Azərbaycan ərazisi Qarabağdakı cəbhə xəttindən hazırladığı reportaja görə Fransadakı ermənilər tərəfindən ölümlə hədələnib.

Publika.az xəbər verir ki, Beynəlxalq Jurnalistlər Şurasının (Global Journalism Council) xarici əlaqələr üzrə sədri Elşad Eyvazlı etiraz bəyanatında jurnalist Liceron Budulunun şiddətə məruz qalmasını, hətta həmkarının reportajının saytdan çıxarılmasını qınadığını bildirib.

Təşkilat adından çıxış edən Elşad Eyvazlı özünü dünyanın siyasi mərkəzi hesab edən Fransa hökumətindən bu məsələ ilə bağlı təcili tədbirlər görülməsini, beynəlxalq hüquqları ayaq altına atan, jurnalisti ölümlə hədələyən Fransa vətəndaşlarının qanun qarşısına cavab vermələrini tələb etdiyini deyib:

"Əks halda Fransanın adı jurnalistlərin peşə fəaliyyətinin məhdudlaşdırıldığı, söz azadlığının boğulduğu ölkələr sırasına düşəcək.

Bir daha jurnalist həmkarımızla bağlı baş vermiş xoşagəlməz faktdan dərin təəsüüf hissi keçirir, təhdidi kəskin şəkildə pisləyir, Fransa hökumətindən təcili addımlar atılmasını istəyirik".