Yanacağın qiyməti nə zaman enəcək?

"Beynəlxalq bazarlarda yanacağın qiyməti enən kimi, avtomatik olaraq Gürcüstan bazarında da ucuzlaşma öz əksini tapacaq".

Publika.az xəbər verir ki, bu barədə Gürcüstanın aparıcı yanacaq tədarükçüsü olan “Visoli” şirkətinin prezidenti Soso Pxakadze bildirib.

Onun sözlərinə görə, Rusiya-Ukrayna müharibəsi bitənə qədər neftin qiymətinin beynəlxalq bazarlarda ucuzlaşması gözlənilmir:

“Biz həmişə beynəlxalq qiymətə əməl edirik, yanacaq ucuzlaşacaqmı sualına belə cavab verə bilərik. Beynəlxalq bazarda ucuzlaşarsa mütləq bu yanacaqdoldurma məntəqələrində özünü göstərir. Təəssüf ki, Rusiya-Ukrayna müharibəsindən əvvəlki qiymətlə müqayisədə qiymətlər xeyli artıb, bu həm şirkətlərə, həm də əhaliyə mənfi təsir göstərir. İndi bizə müharibədən əvvəl tələb olunan dövriyyə kapitalından iki dəfə yarım çox ehtiyacımız var və söhbət milyonlardan gedir. Müharibə bitənə qədər bu bazarda nə qədər əhəmiyyətli irəliləyişlər edilə biləcəyini bilmirəm. Əgər qiymətlər bir-iki həftə ərzində beynəlxalq bazarda aşağı düşsə, bu, şübhəsiz ki, şəbəkəmizdə mütləq öz əksini tapacaq”.

Bundan əlavə, Pxakadze bildirib ki, “Visoli” şirkəti daim daha ucuz yanacaq mənbəyi axtarır: "Müharibə başlayandan sonra iki ölkə arasında sülh danışıqları dövrü oldu, eyni zamanda Amerika qiymətləri aşağı salmaq və bazarı sabitləşdirmək üçün neft ehtiyatlarını satışa çıxardı, lakin bu, qısa müddət idi. Sülh danışıqları uğursuz oldu və barelin qiyməti 120 dollara qayıtdı. Biz çox istəyirik ki, yanacağın qiyməti aşağı olsun, çünki belə olsa, yanacaq daha çox satılacaq. Həmçinin hökumətlə bərabər qiymətin düşəcəyini biz də gözləyirdik, amma işlər daha da pisləşdi. Biz indi də ucuz yanacaq mənbəyi tapmağa çalışırıq”, - deyə Pxakadze bildirib.

Tural Turan