95 markalı benzin dünya bazarında bahalaşırsa...

Dünya bazarında neftin qiymətinin artması ilə bağlı əksər ölkələrdə dizelin və benzinin əsas növlərinin adekvat bahalaşması müşahidə edilir.

Publika.az bu barədə mötəbər mənbəyə istinadla xəbər verir. Səlahiyyətli mənbənin açıqlamasına görə, Azərbaycan öz neftindən dizel yanacağı və 92 marka benzin istehsal edir və ölkədə yanacağın fiksə olunmuş qiyməti dünya bazarındakı qiymət tendensiyasından asılı olmayaraq tənzimlənir və Azərbaycan dünyada yanacağın ən ucuz olduğu ölkələrdən biridir.

"Xaricdən satın aldığımız 95 markalı benzinin qiymətinə gəldikdə isə, bəli, bu benzinə Azərbaycanda tələbat var, amma digər növlərə olan həcmdə deyil. Yəni, 95 benzinindən yüksək klasslı avtomobillərdə istifadə olunur. Onun qiyməti qalxanda istehlakçıların geniş təbəqəsinin cibinə o qədər də təsir eləmir. Eləcə də digər malların qiymətində özünü göstərmir, çünki daşıyıcılar əsasən dizel və 92 benzin işlədirlər. Sözsüz ki, hazırda dünya bazarında yanacağın bahalaşması ilə bağlı 95 markanın qiymətinin Azərbaycanda da yuxarı qalxma ehtimalı mövcuddur" mənbə bildirib.