Əfsanəvi musiqiçinin qatili ilə bağlı qərar verildi – FOTO

Nyu York ştatının Cəzaların icrası və inzibati nəzarət departamenti 1980-ci ilin dekabrında musiqiçi, “The Beatles” rok qrupunun üzvü, filantrop, sülh uğrunda aktivist, rəssam Con Lennonu (1940-1980) güllələyən Mark David Çapmanın şərti azadlığa buraxılmasından imtina edildiyini açıqlayıb.

Publika.az xəbər verir ki, bu barədə “Associated Press” məlumat yayıb.

Məlumata görə, bu, Nyu Yorkun şimalındakı Qrin-Heyven həbsxanasında ömürlük həbs cəzası çəkən Çapmanın sorğularına cavab olaraq verilən 12-ci imtinadır.

67 yaşlı məhkumun növbəti müraciətinə cari ilin avqustunda baxılıb. Cəzaların icrası və inzibati nəzarət departamentinin nümayəndələri ilə məhbus Çapman arasındakı söhbətin tam mətni hələlik açıqlanmayıb. Lakin məlumdur ki, o, əvvəlki söhbətlərində dəfələrlə tam peşman olduğunu bildirib və öz hərəkətini iyrənc adlandırıb. Eyni zamanda Mark David Çapman ömrünün sonuna qədər həbsdə saxlanılacağı təqdirdə bunu başa düşəcəyini və şikayət etməyəcəyini bildirib.

2020-ci ildə şərti azadlığa buraxılması ilə bağlı əvvəlki müraciətinə baxılarkən məhbus Çapman deyib: “Mən onu öldürdüm... çünki o, çox, çox, çox məşhur idi və bu, yeganə səbəbdir. Mən isə çox, çox, çox məşhur olmaq istəyirdim. Çox eqoistikdir”.

Mark Devid Çapman növbəti dəfə 2024-cü ilin fevralında vaxtından əvvəl azadlığa çıxmaq üçün müraciət edə biləcək.

Səxavət