Paşinyan erməni biznesmenlərə çağırış etdi: Gəlin Azərbaycanla birgə pul qazanaq

İstənilən ikitərəfli münasibətlərdə beynəlxalq atmosfer böyük əhəmiyyət kəsb edir və bu məqsədə nail olmaq üçün beynəlxalq tərəfdaşların belə bir atmosfer yaratması çox vacibdir.

Publika.az xəbər verir ki, bunu Ermənistanın Baş nazir Nikol Paşinyan Hamburqda erməni jurnalistlərlə görüşündə Ermənistan-Türkiyə sərhədinin açılması imkanlarını və bu prosesdə beynəlxalq ictimaiyyətin rolunu müzakirə edərkən deyib.

"Yeri gəlmişkən, onu deyim ki, Ermənistan-Türkiyə münasibətlərinin normallaşması və sərhədlərin açılması indi tamam başqa kontekstdə keçib. Hətta "Sülhün kəsişməsi" və TRIPP layihələri çərçivəsində Ermənistan-Türkiyə sərhədinin açılması Mərkəzi Asiyadan Avropa İttifaqına dəmir yolu xəttinin yaradılması, avtomobil yolunun yaradılması, yeni boru xəttinin çəkilməsi imkanlarının genişləndirilməsi deməkdir. Yaşıl hidrogendən danışırıq. Sizi təəccübləndirəcək layihələr var: bu gün mənim üçün aydındır ki, gələcəkdə nə vaxtsa Mərkəzi Asiyadan Avropaya yaşıl hidrogen kəməri çıxacaq.

İndi Ermənistan-Türkiyə münasibətlərinin normallaşması və sərhədin açılması o deməkdir ki, bu potensial boru kəməri əlavə marşrut əldə edəcək ki, bu da həm bizim region ölkələrinin, həm də Avropa İttifaqı ölkələrinin xeyrinə olacaq.

Hamburqda işgüzar dairələrin nümayəndələri ilə görüşdə avqustun 8-də mühüm siyasi qərarın qəbul edildiyini və siyasi liderliyin nümayiş etdirildiyini bildirdim, amma indi hiss edirəm ki, iqtisadiyyat bizdən, siyasətçilərdən irəlidədir. Mən hiss edirəm ki, iqtisadiyyat siyasətdən irəlidədir və bu çox yaxşı xəbərdir, çünki Ermənistan-Azərbaycan münasibətlərində və daha geniş kontekstdə inkişaf edən iqtisadi əlaqələr və iqtisadi maraqlar sabitliyin və təhlükəsizliyin ən etibarlı təminatıdır.

Çünki regiondakı bizneslər birlikdə pul qazanmağa başlayanda və hər biri öz ölkəsinə əlavə gəlir gətirəndə, o zaman heç bir ölkə digərinin və bütövlükdə regionun sabitliyini pozmaqda maraqlı olmayacaq. Əksinə, onlar öz ölkələrinin və regionun sabitliyinə böyük maraq göstərəcəklər", - Paşinyan bildirib.

Paşinyan erməni iş adamlarını siyasətə “fasilə” verməyə çağırıb.

“Diqqətin yayınması adətən təhlükəlidir: bu halda ən etibarlı və təsirli iş regional iqtisadiyyata gəlib regional siyasətdən yayınmaqdır. Əvvəllər düşünürdük ki, iqtisadiyyat siyasətə təkan verəcək, indi iqtisadiyyat siyasəti çəkəcək ki, bu, daha effektivdir”.

Tural